മുംബൈ: മഹാരാഷ്ട്രയില് അച്ഛേ ദിന് കൊണ്ടു വരുമെന്ന് മുഖ്യമന്ത്രി ഏക്നാഥ് ഷിന്ഡെ. ജനങ്ങള്ക്കായി അച്ഛേ ദിന് കൊണ്ടു വരാനുളള ശ്രമത്തിലാണെന്ന് ഷിന്ഡെ പറഞ്ഞു.
ഉപമുഖ്യമന്ത്രി ദേവേന്ദ്ര ഫഡ്നാവിസുമൊത്തുള്ള ഡല്ഹി സന്ദര്ശനത്തിന് പിന്നാലെയാണ് അദ്ദേഹത്തിന്റെ പ്രതികരണം.
രാഷ്ട്രപതി രാംനാഥ് കോവിന്ദ്, പ്രധാനമന്ത്രി നരേന്ദ്ര മോദി എന്നിവരുമായി അദ്ദേഹം കൂടിക്കാഴ്ച നടത്തി. മന്ത്രിസഭ വികസനത്തെക്കുറിച്ചും നിര്ണായക ചര്ച്ചകള് നടന്നുവെന്നാണ് റിപ്പോര്ട്ട്. തന്റെ മുഖ്യമന്ത്രി പദം ജനങ്ങള്ക്ക് നീതി ലഭ്യമാക്കാന് ഉപയോഗിക്കും. ബാലേസാഹബ് താക്കറെയുടെ ഹിന്ദുത്വത്തേയും പിന്തുണക്കുമെന്നും അദ്ദേഹം പറഞ്ഞു.
തെരഞ്ഞെടുപ്പ് പ്രചാരണവേദികളില് ബി.ജെ.പി വ്യാപകമായി ഉപയോഗിച്ച പദമായിരുന്നു അച്ഛേ ദിന്. നല്ല നാളുകള് വരുമെന്ന ബി.ജെ.പിയുടെ പ്രചാരണത്തിനെതിരെ പ്രതിപക്ഷം വലിയ വിമര്ശനങ്ങള് ഉയര്ത്തിയിരുന്നു. നേരത്തെ ഉദ്ധവ് താക്കറെ സര്ക്കാറിനെ അട്ടിമറിച്ചാണ് ഏക്നാഥ് ഷിന്ഡെ അധികാരത്തിലെത്തിയത്. ഷിന്ഡെയുടെ നേതൃത്വത്തില് ഭൂരിപക്ഷം എം.എല്.എമാരും പാര്ട്ടി വിട്ടതോടെയാണ് സഖ്യസര്ക്കാര് പ്രതിസന്ധിയിലായത്.