കുറ്റ്യാടി: ശബ്ദമോ കുലുക്കമോ ഇല്ലാതെ സോളാര്‍ ബോട്ടില്‍ പെരുവണ്ണാമൂഴി ഡാമിലെ തടാകത്തിലൂടെയുള്ള ബോട്ട് സവാരി സന്ദര്‍ശകര്‍ക്ക് ഹരമാവുന്നു.
10 ഉം 20 ഉം സീറ്റുകളുള്ള രണ്ട് ജപ്പാന്‍ നിര്‍മിത ബോട്ടുകളാണ് ജലസേചന വകുപ്പ് ഇറക്കിയിരിക്കുന്നത്. അര മണിക്കൂര്‍ കൊണ്ട് രണ്ടര കിലോമീറ്റര്‍ സഞ്ചരിക്കും. ജപ്പാന്‍ കുടിവെള്ള പദ്ധതി കിണര്‍, പമ്ബ്ഹൗസ്, രണ്ടര കിലോമീറ്റര്‍ ചുറ്റളവുള്ള പക്ഷിദ്വീപ്, ചെറിയ കുറെ ദ്വീപുകള്‍, സ്മൃതിവനം, പ്ലാന്റേഷന്‍ കോര്‍പറേഷന്റെ 943 ഏക്കര്‍ റബര്‍ എസ്റ്റേറ്റ്, മീന്‍ വളര്‍ത്തു കേന്ദ്രം എന്നിവ കാണാം. പെരുവണ്ണാമൂഴി ചെറുകിട ജലവൈദ്യുതി പദ്ധതി പവര്‍ ഹൗസിലേക്ക് വെള്ളമെത്തിക്കാന്‍ പുഴയില്‍ തുരങ്കം നിര്‍മിച്ചതും കാണാം. ഇന്ത്യയില്‍ ആദ്യമായി ടൂറിസം മേഖലയില്‍ സോളാര്‍ ബോട്ട് ഇറക്കിയത് പെരുവണ്ണാമൂഴിയിലാണെന്ന് ബന്ധപ്പെട്ടവര്‍ പറഞ്ഞു.
പരിസ്ഥിതി ലോല പ്രദേശമായ ഇവിടെ ശബ്ദശല്യം ഒഴിവാക്കുന്നതിനാണ് സോളാര്‍ ബോട്ടുകള്‍ ഉപയോഗിക്കുന്നത്. ശുദ്ധജല തടാകത്തില്‍ ഡീസല്‍ എന്‍ജിന്‍ ബോട്ടുകള്‍ മലിനീകരണത്തിന് ഇടയാക്കുന്നതിനാല്‍ ഉപയോഗിക്കാന്‍ അനുമതിയില്ല. സ്റ്റിയറിങ്ങില്ലാതെ സെന്‍സര്‍ ഉപയോഗിച്ചാണ് സോളാര്‍ ബോട്ട് നിയന്ത്രിക്കുന്നത്. ആലപ്പുഴക്കാരന്‍ ആന്‍റണിയാണ് ഡ്രൈവര്‍. കൂടെ പാട്ടും പറച്ചിലുമായി കലാകാരനും മുങ്ങല്‍ വിദഗ്ധനുമായ സുഭാഷ് പെരുവണ്ണാമൂഴിയുമുണ്ട്. ബോട്ടിെന്‍റ എന്‍ജിന്‍ ജപ്പാന്‍ നിര്‍മിതമായതിനാല്‍ തകരാറ് പറ്റിയാല്‍ പാര്‍ട്സുകള്‍ കൊറിയറായി വരുത്തണം. എന്നാല്‍ നാലു മാസമായി കുഴപ്പമില്ലാതെ സര്‍വിസ് നടത്തുന്നതായി ഡ്രൈവര്‍ പറഞ്ഞു.
ചക്കിട്ടപാറ സര്‍വിസ് സഹകരണ ബാങ്കാണ് ബോട്ട് സര്‍വിസ് പാട്ടത്തിനെടുത്തത്. ഒരാള്‍ക്ക് 150 രൂപയാണ് ചാര്‍ജെങ്കിലും 18 ശതമാനം ജി.എസ്.ടിയും കൂടി 177 രൂപ കൊടുക്കണം. ചാര്‍ജ് കുറയ്ക്കാന്‍ സര്‍ക്കാര്‍ തലത്തില്‍ തീരുമാനമുണ്ടാകുമെന്നറിയുന്നു.
