കൊച്ചി: നടിയെ ആക്രമിച്ച കേസില് തുടരന്വേഷണത്തിന്റെ അന്തിമ റിപ്പോര്ട്ട് സമര്പ്പിക്കാനായി ഈ മാസം 22 വരെ ഹൈക്കോടതി സമയം നീട്ടിനല്കി. മൂന്നാഴ്ച സമയം വേണമെന്ന പ്രോസിക്യൂഷന്റെ ആവശ്യം കോടതി തള്ളി. മെമ്മറി കാര്ഡിന്റെ നേര് പകര്പ്പും (ക്ലോണ്ഡ് കോപ്പി) മിറര് ഇമേജും അന്തിമ റിപ്പോര്ട്ടും സമര്പ്പിക്കാനാണ് കോടതി സമയം അനുവദിച്ചത്.
തുടരന്വേഷണ റിപ്പോര്ട്ട് തയാറാണെന്ന് ഡിജിപി അറിയിച്ചു. മെമ്മറി കാര്ഡിന്റെ നേര് പകര്പ്പും മിറര് ഇമേജും ഫോറന്സിക് ലാബില് നിന്ന് ലഭിച്ചതായും അറിയിച്ചു. ബാലചന്ദ്രകുമാറിന്റെ വെളിപ്പെടുത്തലിന്റെ ഭാഗമായി നടക്കുന്ന തുടരന്വേഷണത്തെ, ദിലീപിന് അനുകൂലമായുള്ള മുന് ഡിജിപി ആര് ശ്രീലേഖയുടെ വെളിപ്പെടുത്തല് ബാധിക്കുന്നില്ലെന്നും രണ്ടും രണ്ടാണെന്നും ഒന്നും ചെയ്യാനില്ലെന്നും കോടതി പരാമര്ശിച്ചു. ബാലചന്ദ്രകുമാറിന്റെ വെളിപ്പെടുത്തലിന് ശേഷമാണ് ശ്രീലേഖയുടെ വെളിപ്പെടുത്തല് എന്നും കോടതി ചൂണ്ടിക്കാട്ടി.
തുടരന്വേഷണത്തിന് സമയം നീട്ടി നല്കണമെന്നും ശ്രീലേഖയുടെ വെളിപ്പെടുത്തല് കൂടി അന്വേഷിക്കണമെന്നും അതിജീവിത ആവശ്യപ്പെട്ടു. കേസ് കേള്ക്കുന്നതില് നിന്ന് പിന്മാറണമെന്ന അതി ജീവിതയുടെ ആവശ്യം കോടതി കണക്കിലെടുത്തില്ല. ഇത് മുന്നാം തവണയാണ് ഹൈക്കോടതി സമയം നീട്ടി നല്കുന്നത്. നടിയെ അക്രമിച്ച ദൃശ്യങ്ങള് അടങ്ങിയ മെമ്മറി കാര്ഡിന്റെ ഹാഷ് വാല്യൂ മാറിയിട്ടുണ്ടന്ന റിപ്പോര്ട്ടിനെ തുടര്ന്നാണ് കുടുതല് അന്വേഷണത്തിനായി ക്രൈംബ്രാഞ്ച് സമയം നീട്ടി ചോദിച്ചത്.