പെരുമ്പാവൂര്‍: എം.സി റോഡിലെ കീഴില്ലത്ത് വീട് ഇടിഞ്ഞുതാണ് മുത്തശ്ശനും പേരക്കുട്ടിയും മണ്ണിനടിയില്‍ കുടുങ്ങി. പേരക്കുട്ടി മരിച്ചു. ഇരുനില വീടിന്റെ ഒരു നില പൂര്‍ണമായും ഇടിഞ്ഞു താഴുകയായിരുന്നു. സൗത്ത് പരത്തുവയലിപ്പടിയിലാണ് സംഭവം. രാവിലെ ഏഴു മണിയോടെ വലിയ ശബ്ദത്തോടെ വീട് ഇടിഞ്ഞുതാഴുകയായിരുന്നു.
താഴത്തെ നിലയുടെ ഒരു മീറ്റര്‍ ഒഴികെ ബാക്കി ഭാഗം പൂര്‍ണമായും മണ്ണിനടിയിലാണ്. പരത്തു വയലിപ്പടി തോട്ടം ഇല്ലമാണ് ഇടിഞ്ഞു താഴ്ന്നത്. അപകടം നടക്കുമ്പോള്‍ ആറുപേരാണ് വീട്ടിലുണ്ടായിരുന്നത്. നാരായണന്‍ നമ്പൂതിരി (87), കൊച്ചുമകന്‍ ഹരിനാരായണന്‍ നമ്പൂതിരി (13 ) എന്നിവരാണ് വീടിനകത്ത് കുടുങ്ങിയത്.
നാരായണന്‍ നമ്പൂതിരിയുടെ മകന്‍ ഈശ്വരന്‍ നമ്പൂതിരി അടക്കം നാലുപേര്‍ വീടിന് പുറത്തായിരുന്നു. മകള്‍ ദേവിക ഇരുനില വീടിന്റെ ടെറസിലും. മൂന്നു ജെ.സി.ബി എത്തിയാണ് രക്ഷാപ്രവര്‍ത്തനം നടത്തിയത്. ഒരു ജെ.സി.ബി ഇടിഞ്ഞു താഴ്ന്ന വീടിന്റെ ബാക്കി ഭാഗം താങ്ങി നിര്‍ത്തിയ ശേഷമാണ് രക്ഷാപ്രവര്‍ത്തനം നടത്തിയത്. നാരായണന്‍ നമ്പൂതിരി കട്ടിലില്‍ കിടക്കുകയായിരുന്നെന്ന് രക്ഷാപ്രവര്‍ത്തനം നടത്തിയവര്‍ പറഞ്ഞു. കൊച്ചുമകന്‍ ഹരി നാരയണന്‍ നമ്പൂതിരി സെറ്റിയില്‍ ഇരിക്കുന്ന രീതിയിലുമായിരുന്നു. മണിക്കൂറുകള്‍ പ്രയത്‌നിച്ചാണ് അഗ്‌നി രക്ഷസേന ഇരുവരേയും പുറത്തെടുത്തത്. ജില്ല ഫയര്‍ ഓഫീസര്‍ സ്ഥലത്തെത്തി പരിശോധന നടത്തി.
