കൊല്ലം : കോണ്‍ഗ്രസ് അധ്യക്ഷ സോണിയ ഗാന്ധി, കെ.പി.സി.സി അധ്യക്ഷന്‍ കെ. സുധാകരന്‍, ഡി.സി.സി അധ്യക്ഷന്‍ പി.രാജേന്ദ്ര പ്രസാദ് എന്നിവര്‍ ആഗസ്റ്റ് മൂന്നിന് ഹാജരാകാന്‍ കോടതി ഉത്തരവ്. കൊല്ലം മുന്‍സിഫ് കോടതിയാണ് സമന്‍സ് അയച്ചത്.
കോണ്‍ഗ്രസ് നിയമാവലിക്ക് വിരുദ്ധമായി ഡി.സി.സി അധ്യക്ഷന്‍ പുറപ്പെടുവിച്ച സസ്‌പെന്‍ഷന്‍ ഉത്തരവ് റദ്ദാക്കണമെന്ന് ആവശ്യപ്പെട്ട് കുണ്ടറയിലെ പ്രാദേശിക നേതാവ് പൃഥ്വിരാജ് നല്‍കിയ ഹരജിയിലാണ് മൂന്നുപേരോടും ഹാജരാകാന്‍ കോടതി ഉത്തരവിട്ടത്.
കേസിന്റെ തീരുമാനം വരുന്നതുവരെ കെ.പി.സി.സി അംഗങ്ങളുടെ തെരഞ്ഞെടുപ്പില്‍ കുണ്ടറ ബ്ലോക്കില്‍ നിന്നുള്ള പ്രതിനിധിയെ നിശ്ചയിക്കുന്നത് തടയണമെന്ന് ആവശ്യപ്പെട്ട് ഉപഹരജിയും പൃഥ്വിരാജ് നല്‍കിയിരുന്നു.
കഴിഞ്ഞ ലോക്സഭ തെരഞ്ഞെടുപ്പ് വേളയില്‍ രാജ്‌മോഹന്‍ ഉണ്ണിത്താന്‍ ഉന്നയിച്ച ആരോപണങ്ങളെ തുടര്‍ന്ന് ഡിസിസി അധ്യക്ഷയായിരുന്ന ബിന്ദു കൃഷ്ണയാണ് പൃഥ്വിരാജിനെതിരെ അച്ചടക്ക നടപടി സ്വീകരിച്ചത്. നടപടി പിന്‍വലിക്കണമെന്ന് ആവശ്യപ്പെട്ട് നിവേദനം നല്‍കിയെങ്കിലും ബന്ധപ്പെട്ടവര്‍ പ്രതികരിച്ചില്ലെന്ന് ചൂണ്ടിക്കാട്ടിയാണ് പൃഥ്വിരാജ് കോടതിയെ സമീപിച്ചത്.
