ഡല്ഹി : ലോക്സഭക്ക് പിന്നാലെ രാജ്യസഭയിലും എംപിമാര്ക്ക് സസ്പെന്ഷന്. നടുത്തളത്തിലിറങ്ങി പ്രതിഷേധിച്ച 19 എംപിമാരെയാണ് ഒരാഴ്ചത്തേക്ക് സസ്പെന്ഡ് ചെയ്തത്. ഡിഎംകെ എംപി കനിമൊഴി സോമു, തൃണമൂല് എംപിമാരായ സുഷ്മിത ദേവ്, ഡോള സെന്, ശാന്തനു സെന്, കേരളത്തില് നിന്നുള്ള സിപിഎം, സിപിഐ എംപിമാരായ എഎ റഹീം, വി ശിവദാസന്, പി സന്തോഷ് കുമാര് എന്നിവരും സസ്പെന്ഡ് ചെയ്യപ്പെട്ട എംപിമാരില് ഉള്പ്പെടുന്നു. മുന്നറിയിപ്പ് നല്കിയിട്ടും സഭയുടെ നടുക്കളത്തിലേക്ക് ഇറങ്ങി പ്രതിഷേധിച്ചുവെന്നാണ് സസ്പെന്ഷന്റെ കാരണമായി പറയുന്നത്.
ഏഴ് തൃണമൂല് കോണ്ഗ്രസ് എംപിമാര്, ആറ് ഡിഎംകെ എംപിമാര്, മൂന്ന് ടിആര്എസ് എംപിമാര്, രണ്ട് സിപിഎം എംപിമാര്, ഒരു സിപിഐ എംപി എന്നിവര്ക്കെതിരെയാണ് നടപടി. സോണിയ ഗാന്ധിയുടെ ചോദ്യം ചെയ്യല് നടക്കുന്നതിനാല് പ്രതിപക്ഷത്തെ കോണ്ഗ്രസ് എംപിമാര് സഭയില് ഉണ്ടായിരുന്നില്ല.
വിലക്കയറ്റം, ജിഎസ്ടി വിഷയങ്ങളില് 11 മണിയോടെ രാജ്യസഭയുടെ നടുക്കളത്തില് പ്രതിഷേധമുണ്ടായി. ഇതോടെ സഭ നിര്ത്തി വെച്ചു. പിന്നീട് 12 മണിയോടെ വീണ്ടും സഭ ചേര്ന്നപ്പോഴും എംപിമാര് പ്രതിഷേധം തുടര്ന്നു. ഈ സാഹചര്യത്തിലാണ് നടപടിയുണ്ടായതെന്നാണ് വിശദീകരണം. ജിഎസ്ടി സ്ലാബ് മാറ്റം പിന്വലിക്കണമെന്നാവശ്യപ്പെട്ടായിരുന്നു പ്രതിപക്ഷ എംപിമാര് പ്രധാനമായും പ്രതിഷേധിച്ചത്.