കുറ്റിപ്പുറം: രണ്ടുവര്‍ഷത്തിനുശേഷം തൃശൂര്‍-കണ്ണൂര്‍ പാസഞ്ചര്‍ ഓടിത്തുടങ്ങിയപ്പോള്‍ കന്നിയോട്ടം തന്നെ താളംതെറ്റി.
കോയമ്പത്തൂര്‍ ഇന്റര്‍സിറ്റിക്കും എറണാകുളം ഇന്റര്‍സിറ്റിക്കും ഇടയില്‍ സമയക്രമമായതാണ് വിനയായത്. കുറ്റിപ്പുറത്ത് രാവിലെ 8.09ന് എത്തേണ്ട ട്രെയിന്‍ 45 മിനിറ്റ് വൈകിയാണ് എത്തിയത്. പള്ളിപ്പുറം സ്റ്റേഷനില്‍ രണ്ട് ട്രെയിനിനുവേണ്ടി 40 മിനിറ്റ് പിടിച്ചിട്ടു. ട്രെയിന്‍ കോഴിക്കോട് എത്തിയത് 10.25നാണ്. ഇത് സ്ഥിരം യാത്രക്കാര്‍ക്കും ജോലിക്കാര്‍ക്കും കച്ചവടക്കാര്‍ക്കും വിദ്യാര്‍ഥികള്‍ക്കും വലിയ പ്രയാസമായി.
തൃശൂര്‍-കണ്ണൂര്‍ ട്രെയിന്‍ പുറപ്പെടുന്ന പഴയ സമയമായ രാവിലെ 5.50ല്‍നിന്ന് മാറ്റി 6.35 ആക്കി നിശ്ചയിച്ചതില്‍ യാത്രക്കാര്‍ പ്രതിഷേധം അറിയിച്ചു. മുമ്ബ് കുറ്റിപ്പുറത്തുനിന്ന് 7.35ന് പുറപ്പെട്ടിരുന്നു. സമയക്രമം അട്ടിമറിച്ചത് യാത്രക്കാരോടുള്ള അവജ്ഞയുടെ ഭാഗമാണെന്നാണ് ആക്ഷേപം. നിലവില്‍ ഷൊര്‍ണൂരില്‍ നിന്നുള്ള മെമുവും നിലമ്പൂര്‍ പാസഞ്ചറും പുതിയ സമയക്രമത്തിലെ അപാകത കാരണം സ്ഥിരം യാത്രക്കാര്‍ക്ക് പ്രയോജനമില്ലാത്ത രീതിയിലും കണക്ഷന്‍ ട്രെയിന്‍ കിട്ടാത്ത അവസ്ഥയിലുമാണ്.
പാസഞ്ചര്‍ ട്രെയിനില്‍ ചുരുങ്ങിയ നിരക്കില്‍ യാത്ര ചെയ്തവര്‍ ഇരട്ടി തുക നല്‍കി യാത്ര ചെയ്യേണ്ട ഗതികേടിലാണ്. പാസഞ്ചര്‍ ട്രെയിനില്‍ കോഴിക്കോട്ടുനിന്ന് കുറ്റിപ്പുറം വരെ 15 രൂപ ഉള്ളപ്പോള്‍ എക്‌സ്പ്രസില്‍ 35 രൂപയാണ്. യാത്രക്കാരോട് ചെയ്യുന്ന നീതികേട് അവസാനിപ്പിച്ച് പഴയ സമയക്രമം കൊണ്ടുവരണമെന്ന് കുറ്റിപ്പുറം റെയില്‍വേ ആക്ഷന്‍ ഫോറം ആവശ്യപ്പെട്ടു.
