തിരുവനന്തപുരം: ഭരണഘടനയെ അംഗീകരിക്കാത്തവര്‍ക്ക് രാജ്യത്ത് നില്‍ക്കാന്‍ അധികാരമില്ലെന്ന് കെ.പി.സി.സി അധ്യക്ഷന്‍ കെ.സുധാകരന്‍.
ഭരണഘടനയെ ചോദ്യം ചെയ്തതിലൂടെ ഇന്ത്യയുടെ അസ്ഥിത്വത്തെയാണ് സജി ചെറിയാന്‍ ചോദ്യം ചെയ്തിരിക്കുന്നത്. ഭരണഘടനയുടെ മഹത്വം അറിയാത്ത മന്ത്രിക്ക് എങ്ങനെ അധികാരത്തില്‍ തുടരാന്‍ കഴിയുമെന്നും സുധാകരന്‍ ചോദിച്ചു.
ഭരണഘടനയെ അംഗീകരിക്കാത്ത രണ്ട് കൂട്ടരാണ് ആര്‍.എസ്.എസും സി.പി.എമ്മും. ഇന്ത്യന്‍ സ്വാതന്ത്ര്യത്തെ പോലും അവര്‍ അംഗീകരിച്ചത് ഈയടുത്താണ്. മന്ത്രി സ്വയം രാജിവെക്കാന്‍ തയ്യാറാവണം. അല്ലെങ്കില്‍ മന്ത്രിയെ പുറത്താക്കാന്‍ മുഖ്യമന്ത്രി തയ്യാറാവണമെന്നും സുധാകരന്‍ പറഞ്ഞു.
കമ്യൂണിസ്റ്റ് മാനിഫെസ്റ്റോയെ അല്ല ഇന്ത്യന്‍ ഭരണഘടനയെ ആണ് രാജ്യത്തെ ജനങ്ങള്‍ അംഗീകരിക്കുന്നത്. സി.പി.എം കേരളത്തില്‍ നടത്തുന്ന കൊള്ളരുതായ്മകളൊന്നും നടപ്പിലാവാത്തത് ഭരണഘടനയുള്ളത് കൊണ്ടാണ്. ഭരണഘടനയെ അംഗീകരിക്കാത്തവര്‍ എന്തിന് ഇന്ത്യയില്‍ നില്‍ക്കുന്നൂവെന്നും സുധാകരന്‍ ചോദിച്ചു.
ഭരിക്കുന്ന പാര്‍ട്ടിക്ക് ഭരണഘടനയില്‍ വിശ്വാസമില്ലെങ്കില്‍ രാജിവെക്കണം. തിരഞ്ഞെടുപ്പ് രാഷ്ട്രീയത്തില്‍ നിന്ന് മാറി നില്‍ക്കണമെന്നും സുധാകരന്‍ പറഞ്ഞു.
അതേസമയം, മന്ത്രിയുടെ പ്രസ്താവനയുടെ പശ്ചാത്തലത്തില്‍ ഗവര്‍ണറെ നേരിട്ടു കണ്ട് പരാതി നല്‍കാനൊരുങ്ങുകയാണ് ബിജെപി. കുമ്മനം രാജശേഖരന്റെ നേതൃത്വത്തില്‍ വൈകിട്ട് ഗവര്‍ണറെ കാണും.
