ബംഗളൂരു: മേജര്‍ സെമിനാരികളിലെ ആത്മീയ രൂപീകരണം എന്ന വിഷയത്തില്‍ ബംഗളൂരു ധര്‍മാരാം കോളജില്‍ നടന്ന ദേശീയ കോണ്‍ഫറന്‍സ് സമാപിച്ചു.
മൂന്നുദിവസം നീണ്ടുനിന്ന കോണ്‍ഫറന്‍സില്‍ ഭാരത കത്തോലിക്കാസഭയിലെ പ്രമുഖര്‍ പ്രബന്ധങ്ങള്‍ അവതരിപ്പിക്കുകയും വൈദികവിദ്യാര്‍ഥികളുടെ പരിശീലനത്തിനും ആത്മീയ വളര്‍ച്ചയ്ക്കും ഉതകുന്ന പ്രായോഗിക നടപടികള്‍ ചര്‍ച്ചചെയ്യുകയും ചെയ്തു. സമാപന സമ്മേളനത്തില്‍ പൂനെ ദേ നോബിലി കോളജ് റെക്‌ടര്‍ ഫാ. ഫ്രാന്‍സിസ് പുതുച്ചേരി അധ്യക്ഷത വഹിച്ചു.
സീറോ മലബാര്‍ സഭയുടെ കൂരിയ മെത്രാന്‍ മാര്‍ സെബാസ്റ്റ്യന്‍ വാണിയപ്പുരയ്ക്കല്‍ സമാപന സന്ദേശം നല്‍കി. സിഎംഐ സഭയുടെ പ്രധാന പരിശീലനകേന്ദ്രമായ ധര്‍മാരാം കോളജിന്‍റെ ആഭിമുഖ്യത്തില്‍ സംഘടിപ്പിച്ച ദേശീയ കോണ്‍ഫറന്‍സില്‍ രാജ്യത്തിന്‍റെ വിവിധ ഭാഗങ്ങളില്‍നിന്നായി നിരവധി വൈദികരും സന്യസ്തരും പങ്കെടുത്തു.
