ന്യൂഡല്ഹി: വിദ്വേഷ പ്രസംഗവുമായി ബന്ധപ്പെട്ട് ഉത്തര് പ്രദേശ് മുഖ്യമന്ത്രി യോഗി ആദിത്യ നാഥിനെതിരായ ഹരജി സുപ്രിം കോടതി തള്ളി വിദ്വഷ പ്രസംഗത്തില് യോഗിക്കെതിരെ കേസെടുക്കണമെന്ന ഹരജിയാണ് തള്ളിയത്.
മുഖ്യമന്ത്രി യോഗി ആദിത്യനാഥിനെയും മറ്റുള്ളവരെയും പ്രോസിക്യൂട്ട് ചെയ്യുന്നതിനുള്ള അനുമതി നിഷേധിച്ച ഉത്തര് പ്രദേശ് സര്ക്കാര് നടപടിക്കെതിരായതാണ് ഹരജി. ഉത്തര്പ്രദേശില് നിന്നുള്ള പര്വേസ് പര്വാസ് ആണ് ഹരജിക്കാരന്. പ്രസംഗത്തിന്റെ സിഡി അടക്കമുള്ള തെളിവുകളും ഹരജിക്കാരന് ഹാജരാക്കിയിരുന്നു.
2007ലെ ഹിന്ദു യുവവാഹിനിയുടെ പരിപാടിയില് നടത്തിയ പ്രസംഗത്തില് ന്യൂനപക്ഷത്തിനെതിരായ പരാമര്ശമുണ്ടായിരുന്നു എന്നാണ് ഹരജിയില് പറയുന്നത്. ഗോരഖ്പൂര് സംഘര്ഷത്തിലേക്ക് നയിക്കാന് ഇത് കാരണമായെന്നും ഹരജിയില് പറയുന്നു. നേരത്തെ ഹരജിക്കാരന് അലഹബാദ് ഹൈക്കോടതിയെ സമീപിച്ചിരുന്നു. 2017ല് യോഗിക്കെതിരെ കേസെടുക്കാന് അനുമതി നിഷേധിച്ച യുപി സര്ക്കാര് നടപടിക്കെതിരെയായിരുന്നു ഇത്. എന്നാല് 2018ല് സമര്പ്പിച്ച ഈ ഹരജി അലഹബാദ് ഹൈക്കോടതി തള്ളി. തുടര്ന്നാണ് ഇയാള് സുപ്രിം കോടതിയെ സമീപിച്ചത്.
കെസെടുക്കാന് അനുമതി നല്കുന്നതുമായി ബന്ധപ്പെട്ട നിയമപരമായ ചോദ്യങ്ങളിലേക്ക് കടക്കേണ്ടതുണ്ടെന്ന് കരുതുന്നില്ലെന്ന് കോടതി ചൂണ്ടിക്കാട്ടി. ഇപ്പോള് ഹരജി തള്ളുകയാണെന്നും കോടതി വ്യക്തമാക്കി. ഇനിയും ഹരജി നല്കാനുള്ള സാധ്യതയും കോടതി വ്യക്തമാക്കി.