കോമണ്വെല്ത്ത് ഗെയിംസില് ചരിത്രനേട്ടംകുറിച്ച മലയാളി താരങ്ങളെ കായിക മന്ത്രി വി അബ്ദുറഹിമാന് അഭിനന്ദിച്ചു.ട്രിപ്പിള് ജമ്ബില് സ്വര്ണം നേടിയ എല്ദോസ് പോളിനെയും വെള്ളി നേടിയ അബ്ദുള്ള അബൂബക്കറിനും ഹൃദയം നിറഞ്ഞ അഭിനന്ദനങ്ങള്.
രാജ്യത്തിനാകെ അഭിമാനമാകുന്ന പ്രകടനമാണ് ഇരുവരും കാഴ്ചവെച്ചതെന്നും മന്ത്രി അറിയിച്ചു.
”ട്രിപ്പിള് ജമ്ബില് എല്ദോസ് നേടിയ സ്വര്ണത്തിനും അബ്ദുള്ള നേടിയ വെള്ളിക്കും തിളക്കം ഏറെയാണ്. കേരളം അത്ലറ്റിക്സില് നടത്തുന്ന ശക്തമായ തിരിച്ചുവരവിന്റെ സൂചനയാണിത്. കേരളത്തിന്റെ കായിക മേഖലയ്ക്കാകെ പ്രചോദനമാണിത്. സ്കൂള് തലം മുതല് മികച്ച പ്രകടനം കാഴ്ചവെക്കുന്നവരാണ് എല്ദോസും അബ്ദുള്ളയും.
ഈ സീസണില് ഇരുവരും നല്ല ഫോമിലാണ്.ചെറുപ്പക്കാരായ ഈ താരങ്ങളില് നിന്ന് ഇനിയും ഏറെ നേട്ടങ്ങള് പ്രതീക്ഷിക്കാം. നേരത്തെ ലോങ്ങ്ജമ്ബില് ശ്രീശങ്കര് വെള്ളി നേടിയിരുന്നു. ഈ കോമണ്വെല്ത്ത് ഗെയിംസ് കേരളത്തെ സംബന്ധിച്ച് ഏറെ സന്തോഷം നല്കുന്ന വേദിയാണ്. കൂടുതല് മലയാളി താരങ്ങള്ക്കും ഇന്ത്യയ്ക്കും മികച്ച പ്രകടനം തുടരാന് കഴിയട്ടെ എന്നാശംസിക്കുന്നു.” വി അബ്ദുറഹിമാന് പറഞ്ഞു.