ജയ്പൂര്: രാജ്ഭവനില് രാമകഥാ പാരായണത്തിന് വേദിയൊരുക്കി രാജസ്ഥാന് ഗവര്ണര് കല്രാജ് മിശ്ര. മുന് ആര് എസ് എസ് പ്രചാരകന് വിജയ് കൗശല് നയിക്കുന്ന പരിപാടിക്കാണ് കല്രാജ് മിശ്ര രാജ്ഭവനില് വേദിയൊരുക്കിയത്.
സംഭവം ഇതിനോടകം വലിയ വിമര്ശനങ്ങള് ഏറ്റുവാങ്ങിയിട്ടുണ്ട്. ഇതാദ്യമായാണ് രാജ്ഭവനില് രാമകഥ പരിപാടി സംഘടിപ്പിക്കുന്നത്.
കോണ്ഗ്രസിന്റെ നേതൃത്വത്തിലുള്ള സംസ്ഥാന സര്ക്കാര് വിഷയത്തില് ഇതുവരെ പ്രതികരിച്ചിട്ടില്ല. എന്നാല് സംസ്ഥാന സര്ക്കാരിന്റെ ഡയറക്ടറേറ്റ് ഓഫ് ഇന്ഫര്മേഷന് ആന്ഡ് ബ്രോഡ്കാസ്റ്റിംഗ് പരിപാടിയെ പ്രോത്സാഹിപ്പിക്കുകയാണെന്ന് ഒരു പൗരാവകാശ സംഘടന വിമര്ശനം ഉന്നയിച്ചിട്ടുണ്ട്. ബി ജെ പിയും വിഷയത്തില് പ്രതികരിച്ചിട്ടില്ല.
അതേസമയംശനിയാഴ്ച ആരംഭിച്ച അഞ്ച് ദിവസത്തെ പരിപാടിയുടെ ആദ്യ ദിനത്തില് ബി ജെ പി നേതാക്കള് പങ്കെടുത്തിരുന്നു. പരിപാടിയുടെ എല്ലാ ദിവസവും, വിജയ് കൗശല് വൈകുന്നേരം 4 മുതല് 7 വരെ രാമകഥ വായിക്കും. ഉത്തര്പ്രദേശിലെ വൃന്ദാവനില് നിന്നുള്ളയാളാണ് വിജയ് കൗശല്. കൗശലിന്റെ യൂട്യൂബ് ചാനലില് തത്സമയം സംപ്രേക്ഷണം ചെയ്യുന്ന പരിപാടി പൊതുജനങ്ങള്ക്കായി തുറന്നിരിക്കുന്നു.