ന്യൂഡല്ഹി: മ്യാന്മറില് തടവിലാക്കപ്പെട്ട ഇന്ത്യന് ഐടി ജീവനക്കാരെ മോചിപ്പിക്കാന് പുതിയ നിബന്ധനയുമായി സായുധ സംഘം.
ഒരാള്ക്ക് 3000 ഡോളര് നല്കിയാല് മാത്രമേ വിട്ടയക്കൂ എന്നാണ് സായുധ സംഘം മലയാളികളെ അറിയിച്ചത്. നടപടികള് കര്ശനമാക്കുന്നതിന്റെ ഭാഗമായി ഇന്ത്യക്കാരെ കൂട്ടത്തോടെ രഹസ്യ കേന്ദ്രത്തിലേക്ക് മാറ്റിപ്പാര്പ്പിച്ചു.
കേന്ദ്ര സര്ക്കാരിന്റെ നയതന്ത്ര സമ്മര്ദ്ദം ശക്തമായതോടെ എല്ലാ ഇന്ത്യക്കാരെയും ഘട്ടം ഘട്ടമായി മോചിപ്പിക്കുമെന്ന് സായുധ സംഘം ഇന്നലെ പ്രഖ്യാപിച്ചിരുന്നു. ആദ്യഘട്ടത്തില് ആലപ്പുഴ സ്വദേശികളടക്കം ഏഴുപേരെയാണ് ക്യാമ്ബില് നിന്ന് കൊണ്ടുപോയത്. ഇവരെ പിന്നീട് പോലീസ് സ്റ്റേഷന് മുന്നില് ഇറക്കിവിട്ടു. ബാക്കിയുള്ള കേരളീയരെ തായ്ലന്ഡ് അതിര്ത്തിയിലേക്ക് കൊണ്ടുവരുമെന്ന് അറിയിച്ചിരുന്നു. പാസ്പോര്ട്ട് ഒഴികെ ഫോണിലെ സിം ഉള്പ്പെടെയുള്ള രേഖകള് എല്ലാം സംഘം നശിപ്പിച്ചു.
ഇതിനിടെ ശമ്ബള കുടിശ്ശികയും വീസ രേഖകളും ആവശ്യപ്പെട്ടതോടെയാണ് സായുധ സംഘം നിലപാട് മാറ്റിയത്. 2.5 ലക്ഷം രൂപയ്ക്ക് തുല്യമായ യുഎസ് ഡോളര് നല്കിയാല് മാത്രമേ ബന്ദിയാക്കിയവരെ മോചിപ്പിക്കൂ എന്നാണ് ഇപ്പോള് പറയുന്നത്. കഴിഞ്ഞ ദിവസം അഞ്ച് ലക്ഷം രൂപ മോചനദ്രവ്യം നല്കിയ ശേഷം മുംബൈ സ്വദേശികള് നാട്ടിലേക്ക് പോയതായും സംഘം അറിയിച്ചു.
മ്യാവഡിയില് തന്നെ ആളൊഴിഞ്ഞ സ്ഥലത്തേക്ക് മലയാളികളെ മാറ്റിയിട്ടുണ്ട്. ഇവര് താമസിച്ചിരുന്ന സൈനിക ബാരക്കുകള്ക്ക് സമാനമായ മൂന്ന് നില കെട്ടിടത്തിന്റെ ചിത്രങ്ങളും പുറത്തുവന്നിട്ടുണ്ട്. മെഷീന് ഗണ്ണുമായി സായുധ സംഘം കാവല് നില്ക്കുകയാണെന്ന് ചിത്രങ്ങളില് വ്യക്തമാണ്.