ബംഗളൂരു: പരിപാടിക്കിടെ ചേരയെ പ്രദര്‍ശിപ്പിച്ചതുമായി ബന്ധപ്പെട്ട് ഇഷ ഫൗണ്ടേഷന്‍ ചെയര്‍മാന്‍ സദ്ഗുരു എന്ന ജഗ്ഗി വാസുദേവിനെതിരെ പരാതി.
ചേരയെ അനധികൃതമായി കടത്തുകയും പ്രദര്‍ശിപ്പിക്കുകയും ചെയ്തതിനെതിരെ കേസെടുക്കണമെന്നാവശ്യപ്പെട്ട് സൊസൈറ്റി ഫോര്‍ ദ പ്രിവന്‍ഷന്‍ ഓഫ് ക്രുവല്‍റ്റി ടു അനിമല്‍സ് (എസ്.പി.സി.എ) എന്ന സന്നദ്ധ സംഘടനയുടെ ബോര്‍ഡ് അംഗം സി.എന്‍. പൃഥ്വിരാജാണ് ഫോറസ്റ്റ് ഡെപ്യൂട്ടി കണ്‍സര്‍വേറ്റര്‍ക്ക് പരാതി നല്‍കിയത്.
പരാതിയുടെ പകര്‍പ്പ് ബംഗളൂരു ഡെപ്യൂട്ടി കമീഷണര്‍ക്കും കൈമാറി. 1972 ലെ വന്യജീവി സംരക്ഷണ നിയമം അദ്ദേഹം ലംഘിച്ചതായാണ് പരാതി. വന്യജീവി സംരക്ഷണ നിയമത്തിലെ രണ്ടാം പട്ടിക പ്രകാരം സംരക്ഷിക്കപ്പെട്ട ഇനമാണ് ചേര. ചിക്കബല്ലാപുരില്‍ മുഖ്യമന്ത്രി ബസവരാജ് ബൊമ്മൈ, മുതിര്‍ന്ന ഉദ്യോഗസ്ഥര്‍ എന്നിവരടക്കം പങ്കെടുത്ത ചടങ്ങിലായിരുന്നു ജഗ്ഗി വാസുദേവ് ചേരയെ പ്രദര്‍ശിപ്പിച്ചത്. നിറയെ വെളിച്ചമുള്ള സ്റ്റേജിലാണ് ചേരയെ പ്രദര്‍ശിപ്പിച്ചത്. ഇതിനെ ഇതുവരെ വനംവകുപ്പിന് അദ്ദേഹം കൈമാറിയിട്ടില്ലെന്ന് പരാതിക്കാരന്‍ ചൂണ്ടിക്കാട്ടി.
കേരളത്തിലടക്കം സാധാരണയായി കാണപ്പെടുന്ന വിഷമില്ലാത്ത പാമ്ബുകളാണ് ചേര. മഞ്ഞച്ചേരയും കരിഞ്ചേരയും ഇവയുടെ ഗണത്തിലുണ്ട്. കൃഷിയിടങ്ങളിലും മറ്റുമുള്ള എലികളെ ഇവ ഭക്ഷിക്കുമെന്നതിനാല്‍ ‘കര്‍ഷകന്റെ മിത്രം’ എന്ന വിശേഷണവും ചേരക്കുണ്ട്.
