ന്യൂഡല്ഹി: മഹാരാഷ്ട്ര നിയമസഭയില് നാളെ രാവിലെ 11ന് വിശ്വാസവോട്ടെടുപ്പ് നടത്താന് സുപ്രീംകോടതിയുടെ അനുമതി.
കോടതിയുടെ തീരുമാനം ശിവസേനക്ക് കനത്ത തിരിച്ചടിയായി. ഇതോടെ, ഉദ്ധവ് താക്കറെയുടെ നേതൃത്വത്തിലുള്ള മഹ വികാസ് അഘാഡി സര്ക്കാര് നാളെ നിയമസഭയില് ഭൂരിപക്ഷം തെളിയിക്കണം. മറുപക്ഷത്തു നില്ക്കുന്ന ശിവസേന വിമതര് കനത്ത വെല്ലുവിളിയാണ് ഉയര്ത്തുന്നത്.
വിശ്വാസവോട്ടെടുപ്പിനെതിരെ ശിവസേനയാണ് സുപ്രീംകോടതിയില് ഹരജി സമര്പ്പിച്ചത്. എം.എല്.എമാരെ അയോഗ്യരാക്കി നോട്ടീസ് നല്കിയ തീരുമാനം നിലനില്ക്കെ വിശ്വാസ വോട്ടെടുപ്പിലേക്ക് എങ്ങനെ പോകാന് കഴിയുമെന്ന് ഉദ്ധവിന് വേണ്ടി ഹാജരായ മനു അഭിഷേക് സിങ്വി ചോദിച്ചിരുന്നു. എന്നാല്, അയോഗ്യതയും വിശ്വാസ വോട്ടെടുപ്പും തമ്മില് ബന്ധമെന്താണെന്ന മറുചോദ്യമാണ് കോടതി ചോദിച്ചത്. വിശ്വാസവോട്ടെടുപ്പ് നടത്തുന്നതിന്റെ സമയപരിധിയെക്കുറിച്ച് ഭരണഘടനയില് നിബന്ധനയുണ്ടോ എന്നും കോടതി ആരാഞ്ഞു.
രാഷ്ട്രീയ അനിശ്ചിതത്വം തുടരുന്നതിനിടെയാണ് മഹാരാഷ്ട്രയില് വ്യാഴാഴ്ച വിശ്വാസ വോട്ടെടുപ്പ് നടത്തണമെന്ന് ഗവര്ണര് ഭഗത് സിങ് കോശിയാരി ആവശ്യപ്പെട്ടത്. ബി.ജെ.പിയുടെ ആവശ്യത്തിന് പിന്നാലെയായിരുന്നു ഗവര്ണര് വിശ്വാസ വോട്ടെടുപ്പിന് നിര്ദേശം നല്കിയത്.