കോഴിക്കോട്: നിരോധിക്കപ്പെട്ട റിഹാബ് ഫൗണ്ടേഷനുമായി ഐ.എന്.എല് നേതാക്കള്ക്ക് ബന്ധമുണ്ടെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്റെ ആരോപണം നിഷേധിച്ചു ഐഎന്എല് സംസ്ഥാന ജനറല് സെക്രട്ടറി കാസിം ഇരിക്കൂര്. സുരേന്ദ്രന് പറഞ്ഞത് രാഷ്ട്രീയമായ വിവരക്കേടാണെന്നും അദ്ദേഹം പറഞ്ഞു.
റിഹാബ് ഫൗണ്ടേഷനെ കുറിച്ച് കൂടുതലറിയില്ലെന്നും വിദ്യാഭ്യാസ പ്രവര്ത്തനങ്ങള് നടത്തുന്ന സംഘടനയാണെന്നാണ് അറിവെന്നും അദ്ദേഹം പറഞ്ഞു. ഫൗണ്ടേഷന്റെ തുടക്കകാലത്ത് പാര്ട്ടിയുമായി ബന്ധപ്പെട്ട ചിലര് സഹകരിച്ചിട്ടുണ്ട്. പിന്നീട് ബന്ധമൊന്നുമില്ലെന്നും കാസിം പറഞ്ഞു. സുരേന്ദ്രനെ കൊണ്ട് ഇത് പറയിച്ചത് ആരാണെന്ന് അറിയാമെന്നും അദ്ദേഹം പറഞ്ഞു. പാര്ട്ടിയില് നിന്ന് പുറത്താക്കപ്പെട്ട ക്ഷുദ്ര ശക്തികളാണ് ഇതിന് പിറകില് പ്രവര്ത്തിക്കുന്നതെന്നും അദ്ദേഹം പറഞ്ഞു.
മന്ത്രി ദേവര്കോവിലിനോ മുഹമ്മദ് സുലൈമാനോ റിഹാബ് ഫൗണ്ടേഷനുമായി ഒരു ബന്ധവുമില്ലെന്നും അങ്ങിനെയൊരു സംഘടനയുള്ള കാര്യം ദേവര്കോവിലിന് അറിയുമോ എന്നറിയില്ലെന്നും കാസിം ഇരിക്കൂര് പറഞ്ഞു. ഐ.എന്.എല്ലിന് റിഹാബ് ഇന്ത്യ ഫൗണ്ടേഷനുമായി യാതൊരു ബന്ധവുമില്ല. ഐ.എന്.എല്ലിന്റെ ഒരു നേതാവിനും പ്രവര്ത്തകനും റിഹാബ് ഇന്ത്യ ഫൗണ്ടേഷനുമായി ബന്ധമില്ലെന്ന് തനിക്ക് ഉത്തമവിശ്വാസമുണ്ടെന്നും അദ്ദേഹം പറഞ്ഞു.
ഒരു എന്.ജി.ഒ. എന്നനിലയില് നല്ല ഒരു ഉദ്യമമായാണ് റിഹാബ് ഇന്ത്യ ഫൗണ്ടേഷന് ആരംഭിച്ചത്. എന്നാല് അതിന്റെ പ്രവര്ത്തനം മറ്റുചിലരുടെ കൈകളിലായപ്പോള് മുഹമ്മദ് സുലൈമാന് അടക്കമുള്ള പലരും വിട്ടുനിന്നു. മന്ത്രി അഹമ്മദ് ദേവര്കോവില് റിഹാബ് ഇന്ത്യ ഫൗണ്ടേഷനില് പ്രവര്ത്തിച്ചിട്ടില്ല. ഒരുതരത്തിലും അദ്ദേഹം റിഹാബ് ഇന്ത്യ ഫൗണ്ടേഷന്റെ ഭാഗമായിട്ടില്ലെന്നും കാസിം ഇരിക്കൂര് പ്രതികരിച്ചു.
നേരത്തെ കന്ദ്രസര്ക്കാര് നിരോധിച്ച റിഹാബ് ഇന്ത്യ ഫൗണ്ടേഷനുമായി ബന്ധമുള്ള മന്ത്രി അഹമ്മദ് ദേവര്കോവിലിനെ മന്ത്രിസഭയില്നിന്ന് പുറത്താക്കണമെന്നും വിഷയത്തില് മുഖ്യമന്ത്രി മറുപടി പറയണമെന്നും ബിജെപി. സംസ്ഥാന അധ്യക്ഷന് കെ. സുരേന്ദ്രന് ആവശ്യപ്പെട്ടു.
ഐ.എന്.എല് നേതാവായ പ്രൊഫ. മുഹമ്മദ് സുലൈമാന്, മന്ത്രി അഹമ്മദ് ദേവര്കോവില് തുടങ്ങിയവരാണ് റിഹാബ് ഇന്ത്യ ഫൗണ്ടേഷന്റെ തലപ്പത്തിരുന്നത്. റിഹാബ് ഇന്ത്യ ഫൗണ്ടേഷനുമായി ഐ.എന്.എല്ലിന് വ്യക്തമായ ബന്ധമുണ്ട്. ഒരു നിരോധിത സംഘടനയുടെ തലപ്പത്തിരുന്നയാള്ക്ക് എങ്ങനെ മന്ത്രിസഭയില് തുടരാനാകും. അതിനാല് മന്ത്രി അഹമ്മദ് ദേവര്കോവിലിനെ മന്ത്രിസഭയില്നിന്ന് പുറത്താക്കണമെന്നും ഐ.എന്.എല്ലിനെ ഇടതുമുന്നണിയില്നിന്ന് ഒഴിവാക്കണമെന്നും ബിജെപി. ആവശ്യപ്പെട്ടു. വിഷയത്തില് മുഖ്യമന്ത്രി മറുപടി പറയണമെന്നും ബിജെപി. ആവശ്യപ്പെട്ടിട്ടുണ്ട്.