കൊല്ലം: ഭാരത് ജോഡോ യാത്രയ്ക്കിടെ കോണ്‍ഗ്രസ് നേതാവ് രാഹുല്‍ ഗാന്ധി അമൃതാനന്ദമയിയുമായി കൂടിക്കാഴ്ച നടത്തി.
കൊല്ലം കരുനാഗപ്പള്ളിയില്‍ ഭാരത് ജോഡോ യാത്ര പൂര്‍ത്തിയാക്കിയ ശേഷമാണ് രാഹുല്‍ ഗാന്ധി അമൃതാനന്ദമയി മഠം സന്ദര്‍ശിച്ചത്. മഠത്തില്‍ 45 മിനിറ്റ് ചെലവഴിച്ച ശേഷമാണ് രാഹുല്‍ മടങ്ങിയത്.
അമൃതാനന്ദമയിയുമായുള്ള കൂടിക്കാഴ്ചയുടെ വാര്‍ത്ത രാഹുല്‍ ഗാന്ധി ഫെയ്സ്ബുക്കില്‍ പങ്കുവെച്ചു. “കരുനാഗപ്പള്ളിക്കടുത്തുള്ള ആശ്രമത്തില്‍ അമൃതാനന്ദമയി അമ്മയെ കാണാന്‍ കഴിഞ്ഞത് എന്‍റെ ഭാഗ്യമാണ്. ദരിദ്രരെയും അടിച്ചമര്‍ത്തപ്പെട്ടവരെയും സഹായിക്കാന്‍ അമ്മ നടത്തിയ അതിശയകരമായ പ്രവര്‍ത്തനങ്ങള്‍ എന്നില്‍ മതിപ്പുളവാക്കി. ഞാന്‍ എന്‍റെ എളിയ അഭിവാദ്യങ്ങള്‍ അര്‍പ്പിക്കുകയും പകരം അവരുടെ ഊഷ്മളവും സ്നേഹപൂര്‍ണവുമായ ആലിംഗനം സ്വീകരിക്കുകയും ചെയ്തു.” രാഹുല്‍ ഗാന്ധി എഴുതി.
കൊല്ലം ജില്ലയിലെ പര്യടനം പൂര്‍ത്തിയാക്കി രാഹുല്‍ ഗാന്ധിയുടെ ഭാരത് ജോഡോ യാത്ര ആലപ്പുഴയിലെത്തും. രാവിലെ കരുനാഗപ്പള്ളി പുതിയകാവില്‍ നിന്ന് ആരംഭിക്കുന്ന പദയാത്ര ഓച്ചിറ വഴി ആലപ്പുഴയില്‍ പ്രവേശിക്കും.
