റായ്പൂര്: ഭര്ത്താവിന്റെ ഓഫീസിലെത്തി അയാളെ ചീത്തവിളിക്കുന്നത് ക്രൂരതയാണെന്ന് ഛത്തീസ്ഗഡ് ഹൈക്കോടതി. ഒരു വിവാഹ മോചനക്കേസിലാണ് കോടതിയുടെ പരാമര്ശം.
ജസ്റ്റിസുമാരായ ഗൗതം ഭാദുരി, രാധാകിഷന് അഗര്വാള് തുടങ്ങിയവരുടെ ബെഞ്ചിന്റേതാണ് നിരീക്ഷണം.
പുരുഷന് വിവാഹമോചനം അനുവദിച്ചുകൊണ്ടുള്ള റായ്പൂര് കുടുംബ കോടതിയുടെ വിധിക്കെതിരെ യുവതി നല്കിയ അപ്പീലിലാണ് കോടതിയുടെ പരാമര്ശം. കുടുംബ കോടതിയുടെ വിധി ഹൈക്കോടതി ശരിവച്ചു. യുവതിയുടെ ഭര്ത്താവ് സര്ക്കാര് ഉദ്യോഗസ്ഥനാണ്.
2010ലാണ് യുവാവ് വിധവയായ റായ്പൂര് സ്വദേശിനിയെ വിവാഹം കഴിച്ചത്. യുവാവിന് സര്പ്രവര്ത്തകയുമായി അവിഹിത ബന്ധമുണ്ടെന്ന് യുവതി ആരോപിച്ചിരുന്നു. കൂടാതെ ഭര്ത്താവിന് ട്രാന്സ്ഫര് വേണമെന്നും, അദ്ദേഹത്തെ സ്ഥാനത്തുനിന്ന് നീക്കണമെന്നും ആവശ്യപ്പെട്ട് മന്ത്രിക്ക് കത്തെഴുതിയിരുന്നു. സഹപ്രവര്ത്തകയുമായി അവിഹിത ബന്ധമുണ്ടെന്ന് പറഞ്ഞുകൊണ്ട് ഓഫീസില് പോയും അപമാനിച്ചു.
തുടര്ന്ന് ഭാര്യ തന്നെയും കുടുംബത്തെയും ഉപദ്രവിക്കുന്നെന്ന് ചൂണ്ടിക്കാട്ടിയാണ് യുവാവ് കോടതിയെ സമീപിച്ചത്. 2019 ഡിസംബറില് കുടുംബ കോടതി വിവാഹ മോചനം അനുവദിക്കുകയും ചെയ്തു. ഇതിനെതിരെയാണ് യുവതി ഹൈക്കോടതിയെ സമീപിച്ചത്.