മലപ്പുറം താനൂരില്‍ ബോട്ട് മറിഞ്ഞ് 22 പേര്‍ മരിച്ച സംഭവത്തില്‍ ബോട്ട് ഉടമയായ താനൂര്‍ സ്വദേശി നാസറിനായുള്ള തിരച്ചില്‍ ശക്തമാക്കി.
നാസറിനെതിരെ നരഹത്യാ കുറ്റം ചുമത്തിയാണ് കേസെടുത്തിരിക്കുന്നത്. ഇയാളുടെ സഹോദരന്‍ സലാം, അയല്‍വാസി മുഹമ്മദ് ഷാഫി എന്നിവരെ കൊച്ചിയില്‍ പാലാരിവട്ടം പോലീസ് കസ്റ്റഡിയിലെടുത്തു.
സംഭവത്തില്‍ മനുഷ്യാവകാശ കമ്മിഷന്‍ സ്വമേധയാ കേസെടുത്തു. ബാലവകാശ കമ്മിഷന്‍ അടിയന്തര റിപ്പോര്‍ട്ട് തേടി. അപകടത്തില്‍ പരുക്കേറ്റ് കോട്ടക്കല്‍ മിംസ് ആസ്പത്രിയില്‍ ചികിത്സയിലുള്ളവരെ ആരോഗ്യ മന്ത്രി വീണ ജോര്‍ജ് സന്ദര്‍ശിച്ചു. അതേസമയം, ബോട്ട് അപകടം നടന്ന സ്ഥലത്ത് നടപടിക്രമങ്ങളുടെ ഭാഗമായി ഇന്നും നാളെയും എന്‍ഡിആര്‍എഫ് തിരച്ചില്‍ തുടരും.
ഇന്നലെ അപകടം നടന്നയുടന്‍ ബോട്ട് ഉടമ നാസര്‍ ഒളിവില്‍ പോയിരുന്നു. പാലാരിവട്ടത്ത് പോലീസിന്റെ വാഹന പരിശോധനയിക്കിടെയാണ് നാസറിന്റെ വാഹനമടക്കം കസ്റ്റഡിയിലെടുത്തത്. സഹോദനും സംഘവും എറണാകുളത്ത് എത്തിയത് മുന്‍കൂര്‍ ജാമ്യത്തിന് ശ്രമിക്കാനാണെന്നാണ് വിവരം. അന്വേഷണം ഊര്‍ജിതമാണെന്നും പ്രതിയെ ഉടന്‍ പിടികൂടുമെന്നും മലപ്പുറം എസ്പി സുജിത് ദാസ് അറിയിച്ചു.
നാസറിന്റെ ഫോണ്‍ കോളുകള്‍ കേന്ദ്രീകരിച്ചാണ് അന്വേഷണം നടത്തുന്നത്. ഇതിനിടെ പോലീസിനെ തെറ്റിദ്ധരിപ്പിക്കാനും ഒളിവിലുള്ള ബോട്ടുടമ ശ്രമിച്ചതായാണ് വിവരം. നാസറിന്‍്റെ ഫോണ്‍ സഹോദരന്റെ കൈയിലാണെന്നായിരുന്നു പോലീസിന് ലഭിച്ച വിവരം.
