സമസ്തിപൂര്: ബിഹാറില് വിദ്യാര്ത്ഥികളെ കൊണ്ട് പുസ്തക കെട്ടുകള് ചുമപ്പിച്ച രണ്ടു സര്ക്കാര് സ്കൂളുകളിലെ പ്രധാന അധ്യാപകരെ സസ്പെന്ഡ് ചെയ്തു.
സമസ്തിപൂര് ജില്ലയിലാണ് സംഭവം. ഹനുമാന് നഗര് മിഡില് സ്കൂള്, നാരായണ്പൂര് മിഡില് സ്കൂള് എന്നിവിടങ്ങളിലെ വിദ്യാര്ഥികളാണ് പുസ്തകങ്ങള് തലയില് ചുമക്കാന് നിര്ബന്ധിതരായത്.
തലയില് ഭാരവും താങ്ങി വിദ്യാര്ഥികള് ഒരു കിലോമീറ്ററോളം നടന്നതായാണ് റിപ്പോര്ട്ടുകള് വ്യക്തമാക്കുന്നത്. മൊഹിയുദ്ദിന് നഗറിലുള്ള ബി.ആര്.സി ഭവന് മുതല് സ്കൂള് വരെയാണ് കുട്ടികള് പുസ്തകം ചുമന്നത്. പുസ്തകം കുട്ടികളെ കൊണ്ട് എത്തിച്ചാല് മതിയെന്ന് പ്രധാന അധ്യാപകന് പറഞ്ഞതായി ഒരു അധ്യാപിക ആരോപിച്ചു.
സംഭവത്തിന്റെ വിഡിയോയും ചിത്രങ്ങളും പ്രചരിച്ചതോടെ വിദ്യാഭ്യാസ വകുപ്പ് രണ്ടു സ്കൂളിലെയും പ്രധാന അധ്യാപകര്ക്കെതിരെ നടപടിയെടുത്തു. ഹനുമാന് നഗര് മിഡില് സ്കൂളിലെ പ്രധാന അധ്യാപകന് സുചിത്ര രേഖ റായ്, നാരായണ്പൂര് മിഡില് സ്കൂളിലെ പ്രധാന അധ്യാപകന് സുരേഷ് പസ്വാന് എന്നിവരെ ജില്ലാ പ്രോഗ്രാം ഓഫിസര് സസ്പെന്ഡ് ചെയ്തു.