ഗുരുഗ്രാം: നടപടിക്രമങ്ങള്‍ പാലിക്കാതെ നൂഹില്‍ ഇടിച്ചുനിരത്തല്‍ നടത്തിയിട്ടില്ലെന്ന് ഡെപ്യൂട്ടി കമീഷണര്‍ ധീരേന്ദ്ര ഖഡ്ഗത.
അനധികൃത നിര്‍മാണങ്ങള്‍ നീക്കംചെയ്യുമ്ബോള്‍ സര്‍ക്കാര്‍ ജാതിയുടെയോ മതത്തിന്റെയോ അടിസ്ഥാനത്തില്‍ തിരഞ്ഞെടുത്ത നയം സ്വീകരിച്ചിട്ടില്ലെന്നും ഡെപ്യൂട്ടി കമീഷണര്‍ പറഞ്ഞു. പഞ്ചാബ്-ഹരിയാന ഹൈകോടതി സ്വമേധയാ എടുത്ത കേസിലാണ് പ്രസ്താവന.
സംസ്ഥാന സര്‍ക്കാര്‍ കൈയേറ്റം സംബന്ധിച്ച വിവരങ്ങള്‍ ശേഖരിക്കുമ്ബോള്‍ ജാതി, മതം എന്നിവയുടെ അടിസ്ഥാനത്തിലുള്ള വിവരങ്ങള്‍ ശേഖരിച്ചിട്ടില്ല. എല്ലാ കൈയേറ്റക്കാരോടും ഒരേ നടപടിയാണ് സ്വീകരിച്ചതെന്നും ധീരേന്ദ്ര ഖഡ്ഗത പറഞ്ഞു. അനധികൃത നിര്‍മാണങ്ങള്‍ക്കെതിരെ സ്വതന്ത്ര തദ്ദേശ സ്ഥാപനങ്ങളുടെ പതിവ് നടപടിയാണിതെന്നും പ്രസ്താവനയില്‍ പറയുന്നു.
ആകെ 443 കെട്ടിടങ്ങള്‍ പെളിച്ചിട്ടുണ്ട്. ബാധിക്കപ്പെട്ട 354 പേരില്‍ 71 ഹിന്ദുക്കളും 283 മുസ്ലിംങ്ങളും ഉള്‍പ്പെടുന്നു. ഒരു പ്രത്യേക വിഭാഗത്തെ ലക്ഷ്യംവെച്ചുള്ള പൊളിക്കല്‍ നടപടി എന്ന കോടതിയുടെ ആശങ്കക്ക് മറുപടിയായി സമര്‍പ്പിച്ച സത്യവാങ്മൂലത്തിലാണ് ഡെപ്യൂട്ടി കമീഷണര്‍ വിവരങ്ങള്‍ പങ്കുവെച്ചത്.
