തിരുവനന്തപുരം: ദയാബായിയുടെ നേതൃത്വത്തില്‍ സെക്രട്ടേറിയറ്റിന് മുന്നില്‍ നടക്കുന്ന എന്‍ഡോസള്‍ഫാന്‍ സമരം ഒത്തുതീര്പ്പാക്കാന് സര്‍ക്കാരിന്റെ അനുനയ നീക്കം.
സമരസമിതി നേതാക്കളെ ആരോഗ്യമന്ത്രിയുടെ ഓഫീസിലേക്ക് ക്ഷണിച്ചു. നേരത്തെ രേഖാമൂലം നല്‍കിയ ഉറപ്പുകളില്‍ വ്യക്തതയില്ലെന്ന് സമരസമിതി ആരോപിച്ചിരുന്നു. ഇതില്‍ മാറ്റം വരുത്തി സമരം ഒത്തുതീര്‍പ്പാക്കാനാണ് സര്‍ക്കാര്‍ നീക്കം.
എന്‍ഡോസള്‍ഫാന്‍ ദുരിതബാധിതരുടെ പുനരധിവാസം ആവശ്യപ്പെട്ട് ദയാബായിയുടെ നേതൃത്വത്തില്‍ 18 ദിവസമായി നടത്തിവരുന്ന സമരം ഒത്തുതീര്‍പ്പാക്കാനാണ് സര്‍ക്കാര്‍ നീക്കം. ആരോഗ്യനില വഷളായതിനെ തുടര്‍ന്ന് ആശുപത്രിയില്‍ പ്രവേശിപ്പിച്ച ദയാബായി ആശുപത്രിയിലും സമരം തുടരുകയാണ്.
എന്‍ഡോസള്‍ഫാന്‍ ദുരിതബാധിതരുടെ പുനരധിവാസവുമായി ബന്ധപ്പെട്ട് സമരം ചെയ്യുന്ന ദയാബായി ഉന്നയിച്ച ആവശ്യങ്ങള്‍ വേഗത്തില്‍ പരിഹരിക്കണമെന്ന ആവശ്യം പൊതുജനങ്ങളില്‍ നിന്ന് ഉയര്‍ന്നിരുന്നു. തീരുമാനങ്ങള്‍ വൈകിപ്പിക്കരുത്. സര്‍ക്കാര്‍ മാനുഷിക പരിഗണന നല്‍കണമെന്ന ആവശ്യവും ഉയര്‍ന്നിരുന്നു. പാളയം ഇമാം ഡോ.വി.പി സുഹൈബ് മൗലവി, ശാന്തിഗിരി ജനറല്‍ സെക്രട്ടറി ഗുരുരത്നം ജ്ഞാനതപസ്വി എന്നിവര്‍ ആശുപത്രിയില്‍ സമരം തുടരുന്ന ദയാബായിയെ സന്ദര്‍ശിച്ചു.
