ന്യൂഡല്ഹി: ഡല്ഹി വഖഫ് ബോര്ഡ് ചെയര്മാനും ആംആദ്മി പാര്ട്ടി എം.എല്.എയുമായ അമാനത്തുല്ല ഖാന് അറസ്റ്റില്.
വഖഫ് ബോര്ഡ് നിയമനത്തില് അഴിമതി ആരോപിച്ച് 2020ല് രജിസ്റ്റര് ചെയ്ത കേസുമായി ബന്ധപ്പെട്ടാണ് ഡല്ഹി പൊലീസിലെ അഴിമതി വിരുദ്ധ വിഭാഗം അദ്ദേഹത്തെ അറസ്റ്റ് ചെയ്തത്. ഉച്ചക്ക് 12ന് അദ്ദേഹത്തെ ചോദ്യം ചെയ്യാന് വിളിപ്പിച്ചിരുന്നു.
ഓഖ്ലയില് നിന്നുള്ള എം.എല്.എയായ അമാനത്തുല്ല ഖാന്റെ സഹായിയും ബിസിനസ് പങ്കാളിയുമായ ഹാമിദ് അലിയുടെ വീട്ടില് വെള്ളിയാഴ്ച ഡല്ഹി പൊലീസിന്റെ അഴിമതി വിരുദ്ധ വിഭാഗം (എ.സി.ബി) റെയ്ഡും നടത്തിയിരുന്നു. ജാമിഅ നഗറിലെ വീട്ടില് നടന്ന റെയ്ഡില് 24 ലക്ഷം രൂപയും തോക്കും നോട്ടെണ്ണല് യന്ത്രവും പിടിച്ചെടുത്തു. ഡല്ഹിയിലെ വിവിധയിടങ്ങളില് നടന്ന റെയ്ഡിന്റെ തുടര്ച്ചയായിരുന്നു ഹാമിദ് അലിയുടെ വീട്ടിലും പരിശോധന.
ബെറെറ്റ പിസ്റ്റളാണ് പിടിച്ചെടുത്തതെന്നും ഇതില് ബുള്ളറ്റുകളുണ്ടെന്നും എ.സി.ബി ഉദ്യോഗസ്ഥര് പറഞ്ഞു. എ.എ.പി നേതാവിന്റെ സാമ്ബത്തികകാര്യങ്ങള് കൈകാര്യം ചെയ്യുന്ന സുഹൃത്താണ് ഹാമിദ് അലിയെന്നും ഉദ്യോഗസ്ഥര് ആരോപിച്ചു. സര്ക്കാര് ചട്ടങ്ങള് ലംഘിച്ച് 32 പേരെ അനധികൃതമായി വഖഫ് ബോര്ഡില് നിയമിച്ചെന്നാണ് കേസ്.