ന്യൂഡല്ഹി: ഡല്ഹിയില് വായുമലിനീകരണം രൂക്ഷമാകുന്നു. ഡല്ഹിയിലും പരിസരത്തും വായു ഗുണനിലവാര സൂചിക 400 രേഖപ്പെടുത്തി.
സിസ്റ്റം ഓഫ് എയര് ക്വാളിറ്റി ആൻഡ് വെതര് ഫോര്കാസ്റ്റിംഗ് ആൻഡ് റിസര്ച്ച് (എസ്എഎഫഎആര്) പ്രകാരം ഞായറാഴ്ച രാവിലെ വായു ഗുണനിലവാര സൂചികയില് 410 രേഖപ്പെടുത്തി.
ഒക്ടോബര് 27 മുതല് ഡല്ഹിയിലെ വായു ഗുണനിലവാര സൂചിക 200 പോയിന്റിലധികം വര്ധിച്ചിട്ടുണ്ടെന്ന് കേന്ദ്ര മലിനീകരണ നിയന്ത്രണ ബോര്ഡിന്റെ കണക്കുകള് സൂചിപ്പിക്കുന്നു. നവംബര് മൂന്ന് മുതലാണ് വായു മലിനീകരണം ശക്തമായത്. 2021 നവംബര് 12 ന് രേഖപ്പെടുത്തിയ 471 എന്ന ഏറ്റവും മോശം വായു ഗുണനിലവാരമാണ് ഈ നവംബറിലും രേഖപ്പെടുത്തിയത്.
ഡല്ഹിയില് സിഎൻജി, ഇലക്ട്രിക്, ബിഎസ് VI മാനദണ്ഡങ്ങള് പാലിക്കുന്ന വാഹനങ്ങള്ക്ക് മാത്രമേ അനുമതി നല്കാവൂ എന്ന് ആവശ്യപ്പെട്ട് ഡല്ഹി പരിസ്ഥിതി മന്ത്രി ഗോപാല് റായ് കേന്ദ്ര പരിസ്ഥിതി മന്ത്രി ഭൂപേന്ദര് യാദവിന് കത്തയച്ചിട്ടുണ്ട്. ദീപാവലി കണക്കിലെടുത്ത് കൂടിയാണ് സംസ്ഥാന സര്ക്കാരിന്റെ നീക്കം.