സാഗര്‍: ട്രെയിന്‍ യാത്രക്കാരിയായ യുവതിയെ ശല്യപ്പെടുത്തിയെന്ന പരാതിയില്‍ മധ്യപ്രദേശിലെ രണ്ട് കോണ്‍ഗ്രസ് എംഎല്‍എമാര്‍ക്കെതിരെ കേസെടുത്ത് പോലീസ്. സത്ന എംഎല്‍എ സിദ്ധാര്‍ഥ് കുശ്‌വാഹ, അനുപ്പൂര്‍ എംഎല്‍എ സുനീല്‍ സറഫ് എന്നിവര്‍ക്കെതിരയാണ് കേസെടുത്തിരിക്കുന്നത്.
32 വയസുകാരിയായ യുവതിയുടെ പരാതിയിലാണ് പോലീസ് നടപടി. വെള്ളിയാഴ്ച രാത്രി രേവയില്‍ നിന്ന് ഭോപാലിലേക്ക് സഞ്ചരിക്കുകയായിരുന്ന രേവാഞ്ചല്‍ എക്സപ്രസ് എച്ച്‌ 1 കോച്ചിലാണ് പരാതിക്കാസ്പദമായ സംഭവം നടന്നത്. കത്നി സ്റ്റേഷനില്‍ നിന്ന് അര്‍ധരാത്രിയോടെ ട്രെയിനില്‍ കയറിയ നേതാക്കള്‍ എട്ട് മാസം പ്രായമുള്ള കുഞ്ഞുമായി യാത്ര ചെയ്യുകയായിരുന്ന യുവതിയുടെ കൈയില്‍ കടന്നുപിടിച്ചെന്നും തങ്ങളോടൊപ്പം ഭക്ഷണം കഴിക്കാന്‍ നിര്‍ബന്ധിച്ചെന്നുമാണ് ആരോപണം. യാത്രക്കാര്‍ക്ക് ശല്യമുണ്ടാക്കുന്ന രീതിയില്‍ ഇവര്‍ ഉച്ചത്തില്‍ സംസാരിച്ചെന്നും പരാതില്‍ പറയുന്നു.
യുവതി വിവരമറിയിച്ചതിനെ തുടര്‍ന്ന് ഇവരുടെ അഭിഭാഷകനായ ഭര്‍ത്താവ് റെയില്‍വേ പോലീസിനെ വിവരമറിയിച്ചു. സാഗര്‍ സ്റ്റേഷനില്‍ കാത്തുനിന്ന പോലീസ് സംഘം നേതാക്കള്‍ക്കെതിരെ ഐപിസി 354-ാം വകുപ്പ് പ്രകാരം കേസെടുത്തു. അതേസമയം, ആരോപണം തെറ്റാണെന്ന് അവകാശപ്പെട്ട നേതാക്കള്‍, തങ്ങള്‍ യുവതിയെ ശല്യപ്പെടുത്തിയിട്ടില്ലെന്നും വിളക്കുകള്‍ മങ്ങിയ പ്രകാശത്തില്‍ പ്രവര്‍ത്തിപ്പിച്ചാണ് ഭക്ഷണം കഴിച്ചതെന്നും അറിയിച്ചു. യുവതിയുടെ കൈയില്‍ കടന്നുപിടിച്ചിട്ടില്ലെന്നും ഇവര്‍ പറഞ്ഞു. സംഭവത്തില്‍ വിശദമായ അന്വേഷണം നടത്തുമെന്ന് പോലീസും അറിയിച്ചു.
