ശ്രീനഗര്‍: ജമ്മു കശ്മീരില്‍ ആശങ്കയുയര്‍ത്തി തുടര്‍ച്ചയായുള്ള ഭീകരാക്രമണങ്ങള്‍. ശ്രീനഗറിലെ ഈദ്ഗാഹില്‍ തീവ്രവാദികള്‍ നടത്തിയ ഗ്രനേഡ് ആക്രമണത്തില്‍ ഒരു പ്രദേശവാസിക്ക് പരിക്കേറ്റു.
സുരക്ഷാ സേന പ്രദേശം വളയുകയും തിരച്ചില്‍ ആരംഭിക്കുകയും ചെയ്തു. അജാസ് അഹമ്മദ് എന്ന ആള്‍ക്കാണ് പരിക്കേറ്റത്.
ജമ്മുവില്‍ നിന്ന് 10 കിലോമീറ്റര്‍ അകലെയുള്ള ബജാല്‍ത്തയില്‍ ശനിയാഴ്ച രാത്രിയാണ് സംഭവം നടന്നത്. ഇതോടെ കഴിഞ്ഞ രണ്ട് ദിവസത്തിനിടെ കശ്മീരില്‍ നടന്ന നാലു ഭീകരാക്രമണങ്ങളില്‍ പരിക്കേറ്റവരുടെ എണ്ണം 11 ആയി.
ജമ്മു നര്‍വാളിലും നടന്ന ഇരട്ട സ്ഫോടനങ്ങളുടെ പശ്ചാത്തലത്തില്‍ രജൗരിയില്‍ സുരക്ഷാ ഏജന്‍സികള്‍ യോഗം ചേര്‍ന്നു. റിപ്പബ്ലിക് ദിനാഘോഷത്തിനും ഭാരത് ജോഡോ യാത്രയ്ക്കും സുരക്ഷ ശക്തമാക്കാനും തീരുമാനിച്ചിട്ടുണ്ട്.
