തിരുവനന്തപുരം: ഗവര്ണര്-കേരള സര്വകലാശാല തര്ക്കം രൂക്ഷമായി തുടരുന്നു. തന്റെ നോമിനികളായ 15 സെനറ്റര്മാരെ പിന്വലിച്ചുകൊണ്ട് ഗവര്ണര് അസാധാരണമായ നടപടിയാണ് ഇന്നലെ സ്വീകരിച്ചത്.
നിലവിലെ സാഹചര്യം വൈസ് ചാന്സലര് സര്ക്കാരിനെ അറിയിച്ചിട്ടുണ്ട്.
ചട്ടപ്രകാരം സ്വീകരിച്ച നടപടിയായതിനാല് സര്ക്കാരിന് ഇടപെടാന് കഴിയില്ല. സി.പി.എമ്മിന്റെ തീരുമാനപ്രകാരമാണ് ചൊവ്വാഴ്ച ചേര്ന്ന സെനറ്റ് യോഗത്തില് നിന്ന് ഇടത് അംഗങ്ങള് വിട്ടുനിന്നത്. ഗവര്ണര് കൂടുതല് കടുത്ത നടപടി സ്വീകരിക്കുമെന്നത് സര്ക്കാരിനുള്ള മുന്നറിയിപ്പ് കൂടിയാണ്.
ഇത്രയധികം സെനറ്റര്മാരെ ഒറ്റയടിക്ക് പിന്വലിക്കുന്നത് അസാധാരണ നടപടിയാണ്. ചാന്സലര്ക്ക് താല്പ്പര്യം നഷ്ടപ്പെട്ടാല് അംഗങ്ങളെ പിന്വലിക്കാമെന്ന് ചട്ടത്തില് വ്യവസ്ഥയുണ്ട്. എന്നാല് അപൂര്വമായി പ്രയോഗിക്കുന്ന നടപടിയാണ് ഗവര്ണര് സ്വീകരിച്ചത്. വി.സി സെലക്ഷന് കമ്മിറ്റിയിലേക്ക് സെനറ്റ് നോമിനിയെ നാമനിര്ദ്ദേശം ചെയ്യാനുള്ള ഗവര്ണറുടെ അന്ത്യശാസനം കേരള സര്വകലാശാല നിരന്തരം തള്ളിക്കളയുകയാണ്. ചൊവ്വാഴ്ച ചേര്ന്ന സെനറ്റ് യോഗം ക്വാറം പൂര്ത്തിയാക്കാതെ പിരിഞ്ഞു. ഇടത് അംഗങ്ങള്ക്കൊപ്പം ചാന്സലറുടെ നോമിനികളായ 15 പേരും യോഗത്തില് നിന്ന് വിട്ടുനിന്നു. ഇവരുടെ വിശദാംശങ്ങള് വി.സിയില് നിന്ന് തേടിയ ശേഷമാണ് നടപടി സ്വീകരിച്ചത്.