ബംഗളൂരു: കോളേജിലെ പെണ്‍കുട്ടികളുടെ വിശ്രമമുറിയില്‍ ഒളിക്യാമറ സ്ഥാപിച്ച വിദ്യാര്‍ഥി അറസ്റ്റില്‍. ബംഗളൂരു ഹൊസക്കറഹള്ളിയിലെ സ്വകാര്യ കോളേജില്‍ ബിബിഎ വിദ്യാര്‍ഥിയായ ശുഭം എം ആസാദിനെയാണ് പൊലീസ് അറസ്റ്റ് ചെയ്തത്.
ക്യാമറ സ്ഥാപിക്കുന്നതിനിടെ പെണ്‍കുട്ടികള്‍ ഇയാളെ കാണുകയും തുടര്‍ന്ന് പൊലീസ് ഇയാളെ പിടികൂടുകയുമായിരുന്നു.
വിദ്യാര്‍ഥിനികള്‍ ഇയാള്‍ ക്യാമറ വെക്കാന്‍ ശ്രമിക്കുന്നത് കണ്ടപ്പോള്‍ ബഹളം വെച്ചതിനെ തുടര്‍ന്ന് കോളേജില്‍ നിന്നിറങ്ങിയോടുകയായിരുന്നു. പിന്നീടെ സിസിടിവി ദൃശ്യങ്ങള്‍ അടിസ്ഥാനമാക്കി നടത്തിയ അന്വേഷണത്തിലാണ് ഇയാള്‍ പിടിയിലായത്.
അറസ്റ്റിലായ ശുഭം ആസാദില്‍ നിന്ന് 1200ലേറെ സ്വകാര്യ ദൃശ്യങ്ങളാണ് കണ്ടെടുത്തത്. സുഹൃത്തുക്കള്‍ തമ്മില്‍ അടുത്തിടപഴകുന്ന പലദൃശ്യങ്ങളും ഇയാള്‍ ഫോണില്‍ റെക്കോര്‍ഡ് ചെയ്തിരുന്നു. ഇത്തരത്തില്‍ രണ്ടായിരത്തിലേറെ ദൃശ്യങ്ങള്‍ ഫോണിലുണ്ടായിരുന്നു.
പ്രതി മറ്റൊരു മൊബൈല്‍ ഫോണ്‍ കൂടി ഉപയോഗിക്കുന്നതായി അന്വേഷണത്തില്‍ കണ്ടെത്തിയിട്ടുണ്ട്. എന്നാല്‍ ഈ ഫോണ്‍ ഇതുവരെ കണ്ടെത്താന്‍ കഴിഞ്ഞിട്ടില്ലെന്നും അന്വേഷണം തുടരുകയാണെന്നും പൊലീസ് പറഞ്ഞു.
