കോഴിക്കോട്: മുന് എം.എല്.എ കെ.എം.ഷാജിയുടെ വീട്ടില് നിന്ന് വിജിലന്സ് പിടിച്ചെടുത്ത പണം കണ്ടുകെട്ടാന് സര്ക്കാര് ഉത്തരവിട്ടു.
അഴിമതി നിരോധന നിയമപ്രകാരം 47,35,500 രൂപ കണ്ടുകെട്ടാനാണ് ഉത്തരവ്. പണം തിരികെ നല്കണമെന്നാവശ്യപ്പെട്ട് ഷാജി സമര്പ്പിച്ച ഹര്ജി വെള്ളിയാഴ്ച കോഴിക്കോട് വിജിലന്സ് കോടതി തള്ളിയിരുന്നു.
അഴീക്കോടിലെ വീട്ടില് നിന്ന് പിടിച്ചെടുത്ത തുക കണക്കില്പ്പെടാത്തതാണെന്നും അതിനാല് അഴിമതി നിരോധന നിയമപ്രകാരം കണ്ടുകെട്ടണമെന്നും സര്ക്കാര് ഉത്തരവില് പറയുന്നു. വിജിലന്സിന്റെ ആവശ്യം പരിഗണിച്ചാണ് നടപടി. പണത്തിന്റെ ഉറവിടം ഹാജരാക്കാന് ഷാജിക്ക് കഴിഞ്ഞിട്ടില്ല. അതിനാല് വിജിലന്സ് സമര്പ്പിച്ച അപേക്ഷ പരിഗണിച്ച് പണം കണ്ടുകെട്ടാന് തീരുമാനമെടുക്കാമെന്നും ഉത്തരവില് പറയുന്നു.
കോഴിക്കോട് വിജിലന്സ് സ്പെഷ്യല് സെല്ലിലെ ഡെപ്യൂട്ടി സൂപ്രണ്ടിനെയാണ് പണം കണ്ടുകെട്ടാന് ചുമതലപ്പെടുത്തിയിരിക്കുന്നത്. അതേസമയം കോഴിക്കോട് വിജിലന്സ് കോടതിയുടെ ഉത്തരവിനെതിരെ ഹൈക്കോടതിയെ സമീപിക്കാനാണ് ഷാജിയുടെ തീരുമാനം.