ദില്ലി: ടാറ്റ ഗ്രൂപ്പിന്റെ മുന് ചെയര്മാന് കൂടിയായിരുന്ന വ്യവസായി സൈറസ് മിസ്ത്രി വാഹനാപകടത്തില് മരിച്ചതിന്റെ ഞെട്ടലിലാണ് വ്യവസായ ലോകം.
ഞായറാഴ്ച ഉച്ചയ്ക്ക് രണ്ടരയോടെയായിരുന്നു അപകടം നടന്നത്. മുംബൈ-അഹമ്മദാബാദ് ദേശീയ പാതയില് സൂര്യ നദിയിലെ പാലത്തിലെ ഡിവൈഡറില് മിസ്ത്രി സഞ്ചരിച്ചിരുന്ന ബെന്സ് കാര് കൊണ്ടിടിക്കുകയായിരുന്നു. സംഭവ സ്ഥലത്ത് വെച്ച് തന്നെ മിസ്ത്രി മരിച്ചു.
മിസ്ത്രിയെ കൂടാതെ മൂന്ന് പേരായിരുന്നു വാഹനത്തില് ഉണ്ടായിരുന്നത്. കുടുംബ സുഹൃത്തും ദക്ഷിണ മുംബൈ ബ്രീച്ച് കാന്ഡി ആശുപത്രിയിലെ ഗൈനക്കോളജിസ്റ്റായ അനാഹിത പണ്ഡോളെ,ഭര്ത്താവ് ഡാരിയസ് പണ്ഡോളെ (60),സഹോദരന് ജഹാംഗീര് പണ്ഡോളെ എന്നിവരായിരുന്നു യാത്ര ചെയ്തത്. ഇവരില് ജഹാംഗീര് ആശുപത്രിയിലേക്ക് കൊണ്ടുപോകും വഴി മരിച്ചു. ഗുരുതരമായി പരിക്കേറ്റ അനാഹിതയും ഭര്ത്താവും ആശുപത്രിയില് ചികിത്സയില് കഴിയുകയാണ്.