സിപിഐ സംസ്ഥാന സെക്രട്ടറി കാനം രാജേന്ദ്രന് എതിരെ കോഴിക്കോട് ജില്ലാ സമ്മേളനത്തില് രൂക്ഷ വിമര്ശനം. ലോകായുക്ത വിഷയത്തില് സ്വീകരിച്ച നിലപാട് ശരിയായില്ല.
കാനത്തിന് മുന് സെക്രട്ടറിമാരെ പോലെ പ്രവര്ത്തിക്കാനാകുന്നില്ല. അദ്ദേഹത്തിന്റെ നിലപാടുകള് സംശയാസ്പദമാണെന്നും വിമര്ശനം ഉയര്ന്നു.
ആനിരാജയ്ക്കെതിരെ കാനം സ്വീകരിച്ച നിലപാടിലും സമ്മേളനം അതൃപ്തി അറിയിച്ചു. രണ്ടാം പിണറായി സര്ക്കാരില് മന്ത്രിമാര്ക്ക് വിലയില്ല. ആദ്യ എല്ഡിഎഫ് സര്ക്കാരിന്റെ കാലത്ത് അഴിമതിക്കെതിരെയും അഴിമതി നേരിടുന്ന മന്ത്രിമാര്ക്കെതിരെയും ശക്തമായ നിലപാട് സ്വീകരിച്ചിരുന്നു. അന്ന് മന്ത്രിമാരെ മന്ത്രിസഭയില് നിന്നും യോഗത്തില് മാറ്റി നിര്ത്തുന്നത് ഉള്പ്പെടെയുള്ള കാര്യങ്ങളിലേക്ക് പോയിരുന്നു.
എന്നാല് അന്നൊന്നും ഇല്ലാത്ത ഇടതുപക്ഷ സ്നേഹമാണ് ഇപ്പോള് ഉള്ളതെന്നും സമ്മേളനത്തില് വിമര്ശനം ഉയര്ന്നു. കൃഷി വകുപ്പിനെ സിപിഎം വിഴുങ്ങി. മന്ത്രി വള്ളി ചെരുപ്പിട്ട് നടന്നത് കൊണ്ടും വീട്ടുമുറ്റത്ത് ചെടികള് വെച്ചു പിടിപ്പിച്ചതുകൊണ്ടും കാര്യമില്ല. ഭരിക്കാന് അറിയണമെന്നും റവന്യൂവകുപ്പില് മന്ത്രിയൊഴികെ മറ്റെല്ലാ വകുപ്പിലും അഴിമതിയാണെന്നും വിമര്ശനം ഉയര്ന്നു.
സാംസ്കാരിക കാര്യങ്ങളില് മാത്രമാണ് ജില്ലാ നേതൃത്വത്തിന് താത്പര്യം. ജില്ലാ നേതൃത്വം ശരിയായ രീതിയില് പ്രവര്ത്തിക്കുന്നില്ലെന്നും പ്രതിനിധികള് വിമര്ശിച്ചു. കോഴിക്കോട് ജില്ലാ സമ്മേളനം ഇന്ന് അവസാനിക്കും.