മസ്കത്ത്: യു.എ.ഇയില് നടക്കുന്ന ഏഷ്യ കപ്പ് ക്രിക്കറ്റില് ഇന്ത്യയെ നേരിടുകയെന്നത് സ്വപ്നമാണെന്ന് യു.എ.ഇ ക്രിക്കറ്റ് ടീം ക്യാപ്റ്റനും മലയാളിയുമായ റിസ്വാന് റഊഫ്.
‘എന്റെ ഡ്രീം മാച്ച് ആണത്. ലോകത്തിലെ ഏറ്റവും മികച്ച ടീമിനെതിരെ കളിക്കാന് കഴിയുന്നത് ഏതൊരു കളിക്കാരന്റെയും സ്വപ്നമാണ്. സ്വന്തം രാജ്യത്തിനെതിരെ മറ്റൊരു രാജ്യത്തിന്റെ നായകനായി കളിക്കുകയെന്നത് അപൂര്വമായി സംഭവിക്കുന്ന ഒന്നുമാണ്. ഇത് സാധിക്കുമെന്നാണ് വിശ്വാസം’ -റിസ്വാന് പറയുന്നു. ഏഷ്യ കപ്പ് യോഗ്യത മത്സരങ്ങള് കളിക്കുന്നതിന് മസ്കത്തിലെത്തിയ റിസ്വാന് ‘ഗള്ഫ് മാധ്യമ’വുമായി സംസാരിക്കുകയായിരുന്നു.
യു.എ.ഇ ടീമിന്റെ നായകനാകാന് കഴിഞ്ഞതില് സന്തോഷമുണ്ടെന്നും ഈ പദവി ഉത്തരവാദിത്തം വര്ധിപ്പിക്കുകയാണെന്നും കണ്ണൂര് തലശ്ശേരി സ്വദേശിയായ റിസ്വാന് പറഞ്ഞു. കരിയറിലെ പ്രധാന വഴിത്തിരിവാണിത്. ഉത്തരവാദിത്തം പൂര്ണമായും നിറവേറ്റി ലക്ഷ്യത്തിലെത്താന് പരമാവധി ശ്രമിക്കും. ഏഷ്യ കപ്പിലേക്ക് യോഗ്യത നേടിയാല് ഇന്ത്യയും പാകിസ്താനും പോലുള്ള മികച്ച ടീമുകളുമായി കളിക്കാന് കഴിയുന്നത് യു.എ.ഇ ടീമിന്റെ വളര്ച്ചക്കും ഗുണം ചെയ്യും. ഒരു ദേശീയ ടീമിനെ നയിക്കുകയെന്നത് ഏതൊരു കളിക്കാരന്റെയും സ്വപ്നമാണ്. പ്രവാസിയായി ദുബൈയിലേക്ക് വിമാനം കയറുമ്ബോള് ഇതൊന്നും പ്രതീക്ഷിച്ചിരുന്നില്ല. കേരള രഞ്ജി ടീമില് അംഗമായിരുന്നപ്പോള് അന്താരാഷ്ട്ര ക്രിക്കറ്റില് കളിക്കുന്നത് സ്വപ്നം കണ്ടിരുന്നു. പടിപടിയായി വളര്ന്ന് ദൈവാനുഗ്രഹം കൊണ്ട് അത് സാധിച്ചു. യോഗ്യത മത്സരങ്ങള് നന്നായി കളിക്കുകയെന്നതാണ് ഇപ്പോഴത്തെ ലക്ഷ്യം. ഏഷ്യ കപ്പിലെ മത്സരങ്ങളെ കുറിച്ച് ഇതുകഴിഞ്ഞേ ആലോചിക്കുന്നുള്ളൂയെന്നും റിസ്വാന് പറഞ്ഞു.മികച്ച ടീമാണ് യു.എ.ഇ. മത്സരം വിജയിപ്പിക്കാന് കഴിയുന്ന നിരവധി കളിക്കാര് ടീമിലുണ്ട്. ടീമിലുള്ള മറ്റ് മലയാളികളായ ബാസില് ഹമീദ് മികച്ച ഓള് റൗണ്ടറും അലിഷാന് ഷറഫു യു.എ.ഇ അണ്ടര്19 ടീമിന്റെ മുന് നായകനുമാണ്. മുഹമ്മദ് വസീം ട്വന്റി20 റാങ്കിങ്ങില് ഒമ്ബതാം സ്ഥാനത്തുള്ളയാളാണ്. റോഹന് മുസ്തഫയും നല്ല ഫോമിലാണ്. സാധ്യതകള് ഉപയോഗപ്പെടുത്തി കളിച്ചാല് യു.എ.ഇ ഏഷ്യ കപ്പ് യോഗ്യത ലഭിക്കുമെന്ന പ്രത്യാശയും റിസ്വാന് പങ്കുവെച്ചു. റിസ്വാന്റെ നായകത്വത്തില് യു.എ.ഇ ടീമിന് ഏറെ ആത്മവിശ്വാസമുണ്ടെന്ന് കോഴിക്കോട് കല്ലായി സ്വദേശി ബാസില് ഹമീദ് പറഞ്ഞു. ‘റിസ്വാനും ഞാനും കരിയറിലെ വളര്ച്ച പരസ്പരം കണ്ട് വലുതായവരാണ്. ഞങ്ങള് നാട്ടിലും ഒരുമിച്ച് കളിച്ചിട്ടുണ്ട്. ടീമിന്റെ ജയത്തിനായി ഒരുമിച്ച് നിരവധി സംഭാവനകള് നല്കിയിട്ടുമുണ്ട്. റിസ്വാന്റെ നേതൃത്വത്തില് യു.എ.ഇ ക്രിക്കറ്റില് അത്ഭുതങ്ങള് സംഭവിക്കുമെന്നാണ് പ്രതീക്ഷ’ -ബാസില് ഹമീദ് പറഞ്ഞു.