ബീജിംഗ്: ഇന്ത്യയും ചൈനയും തമ്മിലുള്ള ബന്ധം കരുത്തുറ്റതാക്കിയാല് ഗുണം ലോകരാജ്യങ്ങള്ക്കായിരിക്കുമെന്ന് ചൈനീസ് അംബാസിഡര് സണ് വിഡോംഗ്.
ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിന്റെ ഭാഗമായി അദ്ദേഹം ചില നിര്ദ്ദേശങ്ങള് മുന്നോട്ട് വെച്ചു. ഇരു രാജ്യങ്ങളും തമ്മില് പരസ്പര വിശ്വാസവും,ധാരണയും വെച്ചുപുലര്ത്തുക, വിന് വിന് സഹകരണം, അതിര്ത്തികളിലെ പ്രതിസന്ധികള് പരിഹരിക്കുക, ഏകോപനവും സഹകരണവും ശക്തിപ്പെടുത്തുക തുടങ്ങിയ മാര്ഗ്ഗങ്ങളെ കുറിച്ച് അദ്ദേഹം പറഞ്ഞു.
റിപ്പബ്ലിക് ചൈനയുടെ 73-ാം വാര്ഷികത്തോടനുബന്ധിച്ച് സംഘടിപ്പിച്ച വിര്ച്വല് പരിപാടിയില് സംസാരിക്കുകയായിരുന്നു വിഡോംഗ്. ഇരു രാജ്യങ്ങളിലെ വികസനങ്ങളും, പരസ്പര സഹകരണത്തോടെയുള്ള പ്രവര്ത്തനവും മൂലം മാത്രമേ ഏഷ്യന് നൂറ്റാണ്ട് എന്ന ആശയം യാഥാര്ഥ്യമാക്കാന് കഴിയു. മറ്റു ഏഷ്യന് രാജ്യങ്ങളെ അപേക്ഷിച്ച് ഇന്ത്യയും ചൈനയും തമ്മിലുള്ള ഐക്യവും, സഹകരണവും ശക്തിപ്പെടുത്തേണ്ട ആവശ്യം ഏറെയാണെന്നും അദ്ദേഹം സൂചിപ്പിച്ചു.
കിഴക്കന് ലഡാക്കിലെ പ്രശ്നം രമ്യമായി പരിഹരിച്ചാല് ഇരു രാജ്യങ്ങള് തമ്മിലുള്ള ബന്ധം കൂടുതല് ശക്തമാകും. കൂടാതെ വികസന കാര്യങ്ങളില് വലിയ സംഭാവനകള് നടത്താന് ഇരു രാജ്യങ്ങള്ക്ക് സാധിക്കും. ഇന്ത്യയും ചൈനയും തമ്മിലുള്ള ബന്ധം ശക്തിപ്പെടുത്തുന്നതില് സാങ്കേതികമായ ബുദ്ധിമുട്ടുകള് നിലനില്ക്കുന്നുണ്ടെന്ന് വിദേശകാര്യ മന്ത്രി എം ജയശങ്കര് കഴിഞ്ഞ മാസം പറഞ്ഞതിന് പിന്നാലെയാണ് വിഡോംഗിന്റെ പ്രതികരണം.
ഇന്ത്യന് അതിര്ത്തികളില് ചൈന നടത്തുന്ന അതിക്രമങ്ങള് അവസാനിപ്പിച്ചെങ്കില് മാത്രമേ ഏഷ്യന് നൂറ്റാണ്ടെന്ന ആശയം സാധ്യമാകു എന്നും ജയശങ്കര് സൂചിപ്പിച്ചിരുന്നു. അടുത്ത വര്ഷം എസ് സി ഒ, ജി20 തുടങ്ങിയവയുടെ പ്രസിഡന്റ് സ്ഥാനം ഇന്ത്യ ഏറ്റെടുക്കും. തുടര്ന്ന് മറ്റു രാജ്യങ്ങളോടൊപ്പം ഇന്ത്യയെ ചൈനയും പിന്തുണയ്ക്കുമെന്നും വിഡോംഗ് കൂട്ടിച്ചേര്ത്തു.