മുംബൈ: കോടതിയില്‍ പോകാതെ വീട്ടിലിരുന്ന് പോലും പൗരന് നിയമപരമായ നീതി ലഭിക്കുന്ന ഇന്‍ഡ്യയിലെ ആദ്യത്തെ സമ്ബൂര്‍ണ ഡിജിറ്റല്‍ ലോക് അദാലതിന് (Digital Lok Adalat) തുടക്കമായി.രാജസ്താന്‍ സ്റ്റേറ്റ് ലീഗല്‍ സര്‍വീസസ് അതോറിറ്റിയും (RSLSA) മഹാരാഷ്ട്ര സ്റ്റേറ്റ് ലീഗല്‍ സര്‍വീസസ് അതോറിറ്റിയും (MSLSA) ശനിയാഴ്ച മുതല്‍ ഈ സേവനം ആരംഭിച്ചു. ആദ്യ ദിവസം തന്നെ 69 ലക്ഷത്തിലധികം കേസുകളാണ് രജിസ്റ്റര്‍ ചെയ്തത്.
രാജ്യത്തുടനീളമുള്ള വിവിധ കോടതികളില്‍ കേസുകളും കെട്ടിക്കിടക്കുന്ന കേസുകളും വര്‍ധിച്ചുവരുന്ന സാഹചര്യത്തില്‍, ഇന്‍ഡ്യന്‍ നീതിന്യായ വ്യവസ്ഥയുടെ ചരിത്രത്തിലെ നാഴികക്കല്ലായി ഡിജിറ്റല്‍ ലോക് അദാലത് മാറും. കേസ് ഫയല്‍ ചെയ്യുന്നത് മുതലുള്ള നിയമനടപടികള്‍ ഓണ്‍ലൈനായി ചെയ്യുന്നതിനുള്ള സംവിധാനമാണ് ഡിജിറ്റല്‍ ലോക് അദാലത്.
രാജസ്താനിലെ ഡിജിറ്റല്‍ ലോക് അദാലത് മൊത്തം 568 ബെഞ്ചുകള്‍ രൂപീകരിച്ചു, അതില്‍ ആകെ 5,62,295 കേസുകള്‍ രജിസ്റ്റര്‍ ചെയ്തു, 2,28,863 കേസുകള്‍ മുമ്ബത്തെയും 3,33,432 കേസുകള്‍ സംസ്ഥാനത്തെ വിവിധ കോടതികളില്‍ കെട്ടിക്കിടക്കുന്നവയുമാണ്. മഹാരാഷ്ട്രയിലെ ഡിജിറ്റല്‍ ലോക് അദാലതില്‍ 63,99,983 ട്രാഫിക് ചലാന്‍ കേസുകളാണ് രജിസ്റ്റര്‍ ചെയ്തത്. ലോകത്തിലെ ആദ്യത്തെ നീതിന്യായ സാങ്കേതിക കംപനിയെന്ന് അവകാശപ്പെടുന്ന ജൂപിറ്റിസ് ആണ് ഡിജിറ്റല്‍ ലോക് അദാലത് ഒരുക്കിയത്.
എഐ (Artificial intelligence), ബ്ലോക്ചെയിന്‍ (BlockChain) എന്നിവയാല്‍ പ്രവര്‍ത്തിക്കുന്ന ഡിജിറ്റല്‍ ലോക് അദാലത് ജൂലൈയില്‍ ജയ്പൂരില്‍ നടന്ന ’18-ാമത് ഓള്‍ ഇന്‍ഡ്യ ലീഗല്‍ സര്‍വീസസ് അതോറിറ്റി’ യോഗത്തില്‍ നാഷനല്‍ ലീഗല്‍ സര്‍വീസസ് അതോറിറ്റി ചെയര്‍മാനും സുപ്രീം കോടതി ജഡ്ജിയുമായ ജസ്റ്റിസ് ഉദയ് ഉമേഷ് ലളിത് ആണ് ഉദ്ഘാടനം ചെയ്തത്.
