തിരുവനന്തപുരം: കോണ്‍ഗ്രസ് അധ്യക്ഷ സ്ഥാനത്തേക്കു മല്‍സരമുണ്ടാകണമെന്നു ഡോ.ശശി തരൂര്‍ എംപി. സംഘടനാ തിരഞ്ഞെടുപ്പ് പാര്‍ട്ടിക്കു ഗുണം ചെയ്യുമെന്ന് അദ്ദേഹം അഭിപ്രായപ്പെട്ടു.
വോട്ടര്‍പട്ടികയുമായി ബന്ധപ്പെട്ടു താന്‍ ഉന്നയിച്ച വിഷയങ്ങള്‍ പരിഹരിക്കപ്പെട്ടുവെന്നും തരൂര്‍ പറഞ്ഞു. അധ്യക്ഷ സ്ഥാനത്തേക്കു തരൂര്‍ മത്സരിക്കുമെന്ന അഭ്യൂഹങ്ങളോടു പ്രതികരിക്കുകയായിരുന്നു അദ്ദേഹം.
ഈ മാസം 22നാണ് തിരഞ്ഞെടുപ്പിന്റെ വിജ്ഞാപനം വരുന്നത്. 24 മുതല്‍ 30 വരെയാണു നാമനിര്‍ദേശ പത്രികാ സമര്‍പ്പണം. പിന്‍വലിക്കാനുള്ള അവസാന തീയതി ഒക്ടോബര്‍ എട്ടാണ്. ഒന്നിലേറെ സ്ഥാനാര്‍ഥികളുണ്ടെങ്കില്‍ ഒക്ടോബര്‍ 17നു തിരഞ്ഞെടുപ്പു നടക്കും.
കോണ്‍ഗ്രസ് സംഘടനാ തിരഞ്ഞെടുപ്പില്‍ വോട്ടവകാശമുള്ളവര്‍ക്കും മത്സരിക്കാന്‍ താല്‍പര്യമുള്ളവര്‍ക്കും വോട്ടര്‍പട്ടിക നല്‍കണമെന്നു ശശി തരൂര്‍ അടക്കമുള്ള 5 കോണ്‍ഗ്രസ് എംപിമാരുടെ ആവശ്യം തിരഞ്ഞെടുപ്പു സമിതി അധ്യക്ഷന്‍ മധുസൂദന്‍ മിസ്ത്രി അംഗീകരിച്ചിരുന്നില്ല. പട്ടിക പ്രസിദ്ധീകരിക്കില്ലെന്നും വോട്ടര്‍മാരുടെ വിവരങ്ങള്‍ ഈ മാസം 20 മുതല്‍ നാമനിര്‍ദേശ പത്രിക സമര്‍പ്പിക്കുന്നതുവരെ തന്റെ ഓഫിസില്‍ വന്നു പരിശോധിക്കാമെന്ന് 5 എംപിമാരെയും മിസ്ത്രി അറിയിച്ചിരുന്നു. കത്തയച്ചതില്‍ തരൂരും മനീഷ് തിവാരിയും ജി 23 ഗ്രൂപ്പിലുണ്ടായിരുന്നവരാണ്.
