പാലക്കാട്: അട്ടപ്പാടി മധുകേസില് ഒരു സാക്ഷി കൂടി കൂറുമാറി. പതിനാറാം സാക്ഷിയായി പ്രോസിക്യൂഷന് ഹാജരാക്കിയ വനംവകുപ്പ് വാച്ചര് റസാഖ് ആണ് കോടതിയില് മൊഴി മാറ്റിയത്.
ഇതോടെ കേസില് ഇതുവരെ കൂറുമാറിയ സാക്ഷികളുടെ എണ്ണം ആറായി. മൊഴി മാറ്റി പറഞ്ഞവരെല്ലാം സാക്ഷികളായി പ്രോസിക്യൂഷന് ഹാജരാക്കിയവരാണ്. ഇവരെല്ലാം മജിസ്ട്രേട്ടിന് മുന്നില് മൊഴി നല്കിയവരാണ്.
പന്ത്രണ്ടാം സാക്ഷിയായ മുക്കാലി ഫോറസ്റ്റ് സ്റ്റേഷനിലെ താത്കാലിക വാച്ചറായ അനില് കുമാറിനെ കഴിഞ്ഞ ദിവസം വനം വകുപ്പ് പിരിച്ച് വിട്ടിരുന്നു. വിസ്താരത്തിനിടെ മൊഴി മാറ്റിയതിനെ തുടര്ന്നായിരുന്നു പിരിച്ചുവിടല്. മധുവിനെ അറിയില്ലെന്നാണ് അനില് കുമാര് കഴിഞ്ഞ ദിവസം കോടതിയെ അറിയിച്ചത്. പൊലീസിന്റെ നിര്ബന്ധ പ്രകാരമാണ് നേരത്തെ രഹസ്യമൊഴി നല്കിയതെന്നും അനില് കുമാര് വ്യക്തമാക്കിയിരുന്നു. 10,11,14,15 സാക്ഷികളും നേരത്തെ കൂറുമാറിയിരുന്നു.
കൂറുമാറ്റം തടയാന് സാക്ഷികള്ക്ക് കഴിഞ്ഞ ദിവസം മുതല് പൊലീസ് സംരക്ഷണം ഏര്പ്പെടുത്തിയിരുന്നെങ്കിലും നീക്കം ലക്ഷ്യം കണ്ടിട്ടില്ല എന്നാണ് ഒടുവിലത്തെ കൂറുമാറ്റവും തെളിയിക്കുന്നത്. സാക്ഷികളെ പ്രതികള് ഒളിവില് പാര്പ്പിച്ച് കൂറുമാറ്റത്തിന് പ്രേരിപ്പിക്കുന്നുവെന്ന് കുടുംബം ആരോപിച്ചിരുന്നു. സാക്ഷികള് കൂറ് മാറുന്നതില് മധുവിന്റെ സഹോദരി പൊട്ടിക്കരഞ്ഞ് മാധ്യമങ്ങളോട് സങ്കടം പറയുകയും ചെയ്തിരുന്നു. കൂറുമാറാതിരിക്കാന് സാക്ഷികള് പണം ആവശ്യപ്പെട്ടെന്നാണ് സരസു പറഞ്ഞത്.
കേസില് നിന്ന് പിന്മാറാന് വലിയ സമ്മര്ദം ഉണ്ടെന്നും കുടുംബം എസ്പിക്ക് പരാതിയും നല്കിയിരുന്നു. മണ്ണാര്ക്കാടേക്ക് താമസം മാറ്റാനാണ് കുടുംബത്തിന്റെ ആലോചന. ഭീഷണിയും പ്രലോഭനങ്ങളും ഭയന്നാണ് തീരുമാനമെന്നും സരസു പറഞ്ഞിരുന്നു. 2018 ഫെബ്രുവരി 22നാണ് ഒരു സംഘം അക്രമികള് ചേര്ന്ന് മധുവിനെ തല്ലിക്കൊല്ലുന്നത്. ജൂണ് 8ന് കേസില് വിചാരണ തുടങ്ങിയതിന് പിന്നാലെ രണ്ട് പ്രധാന സാക്ഷികള് കൂറ് മാറിയിരുന്നു. പ്രോസിക്യൂഷന്റെ വീഴ്ചയാണ് കുറുമാറ്റത്തിന് ഇടയാക്കിയതെന്ന് ആരോപിച്ച് മധുവിന്റെ അമ്മയും സഹോദരിയും രംഗത്തെത്തുകയും സര്ക്കാര് പുതിയ സ്പെഷ്യല് പബ്ലിക് പ്രോസിക്യൂട്ടറെ നിയമിക്കുകയും ചെയ്തിരുന്നു.