കണ്ണൂര്: പാലക്കാട് നടന്ന യൂത്ത് കോണ്ഗ്രസ് ക്യാംപായ ചിന്തിന് ശിബിരത്തിലെ പീഡന പരാതി നിസ്സാരവത്കരിച്ച് കെപിസിസി അധ്യക്ഷന് കെ.സുധാകരന്. പീഡനപരാതി ചെറിയ രീതിയില് മാത്രമേ ചര്ച്ചയായുള്ളൂവെന്നും ഇക്കാര്യത്തില് തനിക്ക് കാര്യമായ വിവരങ്ങള് ലഭിച്ചിട്ടില്ലെന്നും സുധാകരന് പറഞ്ഞു. വിഷയത്തില് യൂത്ത് കോണ്ഗ്രസ് സംസ്ഥാന അധ്യക്ഷന് ഷാഫി പറമ്പിലിനോട് വിശദീകരണം തേടിയിട്ടുണ്ടെന്നും സുധാകരന് പറഞ്ഞു.
ഭരണഘടനാ വിരുദ്ധ പ്രസ്താവനയില് സിപിഎം സംസ്ഥാന സെക്രട്ടേറിയറ്റ് അംഗം സജി ചെറിയാന് എംഎല്എ സ്ഥാനവും രാജിവയ്ക്കണമെന്ന് കെ.സുധാകരന് ആവശ്യപ്പെട്ടു. സജി ചെറിയാന് നടത്തിയത് ഗുരുതരമായ ചട്ടലംഘനമാണ്, മന്ത്രിസ്ഥാനം രാജിവച്ചാല് മാത്രം പ്രശ്നം തീരുന്നില്ല. ഭരണഘടനാ പ്രകാരം സത്യപ്രതിജ്ഞ ചെയ്ത എംഎല്എ എന്ന നിലയില് ആ പദവി കൂടി സജി ചെറിയാന് രാജിവയ്ക്കണമെന്നും കെ.സുധാകരന് കണ്ണൂരില് ആവശ്യപ്പെട്ടു.
മുഖ്യമന്ത്രിക്കെതിരെ യൂത്ത് കോണ്ഗ്രസ് പ്രവര്ത്തകര് വിമാനത്തിനുള്ളില് പ്രതിഷേധിച്ച സംഭവത്തില് ഇ.പി ജയരാജനെതിരെ കേസെടുത്തില്ലെങ്കില് കോണ്ഗ്രസ് കോടതിയെ സമീപിക്കുമെന്നും സുധാകരന് പറഞ്ഞു.
അതേസമയം യൂത്ത് കോണ്ഗ്രസ് സംസ്ഥാന നേതൃ ക്യാമ്പായ ചിന്തന് ശിബിറിനിടെ പീഡനം നടന്നുവെന്ന പരാതി ഏതെങ്കിലും പെണ്കുട്ടിക്ക് ഉണ്ടെങ്കില് പൊലീസില് പരാതി നല്കുമെന്ന് പ്രതിപക്ഷ നേതാവ് വി ഡി സതീശന് വ്യക്തമാക്കി. പരാതി സംഘടനക്ക് അകത്ത് ഒതുക്കില്ലെന്നും പ്രതിപക്ഷ നേതാവ് വി ഡി സതീശന് പറഞ്ഞു. പരാതി ഉണ്ടോ എന്നറിയാനായി ക്യാമ്പില് പങ്കെടുത്ത പെണ്കുട്ടികളോട് സംസാരിക്കാന് യൂത്ത് കോണ്ഗ്രസ് നേതൃത്വത്തോട് നിര്ദേശിച്ചുവെന്നും വി ഡി സതീശന് പറഞ്ഞു.വാട്സ് ആപ്പില് പ്രചരിക്കുന്ന പരാതി പകര്പ്പ് ശരിയാണോ എന്ന് അന്വേഷിക്കും. സ്ത്രീകള്ക്ക് എതിരായ കാര്യങ്ങളില് ഒരു വിട്ടുവീഴ്ചയും ഉണ്ടാകില്ലെന്നും വി ഡി സതീശന് പ്രതികരിച്ചു,
പാലക്കാട് ചേര്ന്ന ചിന്തിന് ശിബിറിനിടെ യൂത്ത് കോണ്ഗ്രസ് നേതാവ് വിവേക് നായര് പീഡിപ്പിക്കാന് ശ്രമിച്ചെന്ന് വ്യക്തമാക്കി വനിത നേതാവ് നല്കിയ പരാതിയാണ് സോഷ്യല് മീഡിയയില് പ്രചരിക്കുന്നത്. പരാതി യൂത്ത് കോണ്ഗ്രസ് നേതൃത്വത്തിനു നല്കിയെങ്കിലും നടപടി എടുക്കാതെ ഒതുക്കിത്തീര്ക്കാന് ശ്രമിച്ചെന്നാണ് ഉയരുന്ന ആരോപണം. ചിന്തന്ശിബിരിനിടെ പ്രതിനിധിയായ വനിതാ അംഗത്തോട് വിവേക് നായര് മോശമായി പെരുമാറിയെന്നാണ് പരാതി. മദ്യപിച്ചെത്തിയ വിവേക് നായര് കിടക്ക പങ്കിടാന് നിര്ബന്ധിച്ചു, സ്വകാര്യ ഭാഗത്ത് സ്പര്ശിച്ചു, തുടങ്ങിയ ഗുരുതര ആരോപണങ്ങളാണ് വനിതാ അംഗത്തിന്റെ കത്തിലുള്ളത്. ദളിത് വിഭാഗത്തില് നിന്ന് വരുന്ന താന് സംഘടനയില് നിരവധി പ്രതിസന്ധികള് നേരിടുന്നുണ്ട്. അതില് ഒന്നാണ് ഇത്. നിരവധി വനിതാ പ്രവര്ത്തകര് സമാന പ്രശ്നം നേരിടുന്നുണ്ടെന്നും കേരളത്തിന്റെ ചുമതല ഉള്ള സെക്രട്ടറി പുഷ്പലതക്ക് നല്കിയ പരാതിയില് പരാതിക്കാരി പറയുന്നു.
അതേസമയം യൂത്ത് കോണ്ഗ്രസ് ചിന്തന് ശിബിരിനിടെ തനിക്ക് നേരെ ഉയര്ന്ന പീഡന പരാതി വ്യാജമെന്ന് ആരോപണവിധേയനായ വിവേക് നായര് പ്രതികരിച്ചു. പരാതിക്ക് പിന്നില് യൂത്ത് കോണ്ഗ്രസിലെ സഹപ്രവര്ത്തകരാണെന്ന് വിവേക് ഇന്നലെ ഏഷ്യാനെറ്റ് ന്യൂസ് അവറില് പറഞ്ഞു. മറ്റൊരു നേതാവിനോട് മോശമായി പെരുമാറിയതിനാണ് തന്നെ സസ്പെന്റ് ചെയ്തതെന്നും വിവേക് വിശദീകരിച്ചു.