കോഴിക്കോട്: ആലപ്പുഴ ജില്ലാകളക്ടര് ശ്രീറാം വെങ്കിട്ടരാമനെതിരെ സെന്ട്രല് വിജിലന്സിന് പരാതി. അധികാര ദുരുപയോഗം, തെളിവു നശിപ്പിക്കല് എന്നീ കുറ്റങ്ങള് ചെയ്ത ശ്രീറാമിനെ സിവില് സര്വീസില് നിന്നും നീക്കം ചെയ്യാന് കേന്ദ്ര പേഴ്സണല് മന്ത്രാലയത്തോട് നിര്ദ്ദേശിക്കണമെന്നാവശ്യപ്പെട്ട് എല് ജെ ഡി സംസ്ഥാന ജനറല് സെക്രട്ടറി സലീം മടവൂരാണ് പരാതി നല്കിയത്.
പത്രപ്രവര്ത്തകനായ ബഷീറിന്റെ മരണത്തിന് കാരണക്കാരനായ ശ്രീറാം ഐ എ എസ് പദവി ദുരുപയോഗം ചെയ്ത കേസ്സില് നിന്ന് രക്ഷപ്പെടാന് ഗൂഢാലോചന നടത്തിയതായി പരാതിയില് പറയുന്നു. പോലീസിനെ സ്വാധീനിച്ച് സ്വകാര്യ ആശുപത്രിയില് ചികിത്സ തേടുകയും രക്തസാമ്പിള് നല്കാന് വിസമ്മതിക്കുകയും ചെയ്തു. ആശുപത്രിയില് നിന്നും ജയിലിലേക്ക് റിമാന്ഡ് ചെയ്ത് അയച്ചപ്പോഴും ജയില് ഡോക്ടറെ സ്വാധീനിച്ച് ജയില്വാസം ഒഴിവാക്കി. തിരുവനന്തപുരം മെഡിക്കല് കോളേജിലെ ഡോക്ടര്മാര് ഇദ്ദേഹത്തിന് ‘റിട്രോഗ്രേഡ് അംനീഷ്യ’ എന്ന മാനസികരോഗമുണ്ടെന്ന് കണ്ടെത്തിയിട്ടുണ്ട്. ഉത്തരവാദപ്പെട്ട ജോലികള് ചെയ്യാന് ഇദ്ദേഹം യോഗ്യനല്ലെന്നും പരാതിയില് ചൂണ്ടിക്കാട്ടി.
ക്രിമിനല് നടപടി നേരിടുന്ന സിവില് സര്വീസ് ഉദ്യോഗസ്ഥരുടെ സ്ഥാനക്കയറ്റം മുദ്രവെച്ച കവറില് സൂക്ഷിക്കണമെന്നും മൂന്ന് മാസത്തെ ഇടവേളയില് മൂന്ന് തവണ പരിശോധന നടത്തിയ ശേഷവും കേസ് അവസാനിച്ചില്ലെങ്കില് താല്ക്കാലിക പ്രമോഷന് നല്കാമെന്നും പറയുന്നു. എന്നാല് ശ്രീറാം വെങ്കട്ടരാമന് ഡി പി സിയെ സ്വാധീനിച്ച് ഇത്തരം നടപടിക്രമങ്ങള് ലംഘിച്ച് ആരോഗ്യ വകുപ്പില് ജോയന്റ് സെക്രട്ടറിയായി സ്ഥാനക്കയറ്റം നേടി.
താല്ക്കാലിക പ്രമോഷന് പോലും പൊതുജന താല്പര്യം, കുറ്റകൃത്യത്തിന്റെ ഗൗരവ സ്വഭാവം, സാക്ഷികളെ സ്വാധീനിക്കാനുള്ള സാഹചര്യം എന്നിവ പരിഗണിച്ചു വേണമെന്ന സര്ക്കാര് ഉത്തരവുകളും ഡി പി സി കാറ്റില് പറത്തി. ഇത് നിയമ വിരുദ്ധമാണ്. സര്ക്കാര് ഉത്തരവുകളെക്കുറിച്ച് വ്യക്തമായ അറിവുണ്ടായിട്ടും അത് ലംഘിച്ചത് ഗുരുതരമായ കുറ്റകൃത്യമാണെന്നും സലീം മടവൂര് പരാതിയില് പറയുന്നു.