ഡെറാഡൂണ്: പൊലീസിനെ വെല്ലുവിളിച്ച് റോഡിന് നടുവില് ഇരുന്ന് മദ്യപിച്ച സോഷ്യല്മീഡിയ ഇന്ഫ്ലുവന്സര് ബോബി കഠാരിയക്കെതിരെ കേസ്.
ഐപിസിയിലെയും ഐടി നിയമത്തിലേയും വിവിധ വകുപ്പുകള് ചുമത്തിയാണ് കേസെടുത്തിരിക്കുന്നത്.
ഉത്തരാഖണ്ഡ് തലസ്ഥാനമായ ഡെറാഡൂണിലെ ഒരു പ്രധാന റോഡിന് നടുവില് കസേരയിട്ട് ഇരുന്നായിരുന്നു ബോബിയുടെ ഷോ. പരസ്യ മദ്യപാന പ്രകടനം കൂടാതെ റോഡിലൂടെ പോകുന്ന വാഹനങ്ങള് തടയുകയും ചെയ്തു. സംഭവത്തിന്റെ ദൃശ്യങ്ങള് പ്രചരിച്ചതോടെയാണ് പൊലീസ് ഇടപെട്ടത്.
ഹരിയാന ഗുരുഗ്രാം സ്വദേശിയായ ബോബി കഠാരിയക്ക് ഇന്സ്റ്റഗ്രാമില് 6.30 ലക്ഷം ഫോളോവര്മാരുണ്ട്. ബോബിക്കെതിരെ ജില്ലാ കോടതിയില് നിന്ന് ജാമ്യമില്ലാ വാറന്റ് പുറപ്പെടുവിച്ചിട്ടുണ്ടെന്നും ഇയാള് ഉടന് അറസ്റ്റിലാവുമെന്നും എസ്എച്ച്ഒ രാജേന്ദ്ര സിങ് റാവത്ത് പറഞ്ഞു.
ഇയാളെ പിടികൂടാനായി പൊലീസ് സംഘങ്ങള് ഹരിയാനയുള്പ്പെടെ വിവിധ ഇടങ്ങളിലേക്ക് പോയിട്ടുണ്ടെന്നും അദ്ദേഹം അറിയിച്ചു. നേരത്തെ സ്പൈസ് ജെറ്റ് വിമാനത്തിനുള്ളിലിരുന്ന് പുക വലിച്ച് ഇയാള് വിവാദത്തിലായിരുന്നു.