തിരുവനന്തപുരം: പൊതുവിദ്യാഭ്യാസ വകുപ്പില് ഫയലുകള് കെട്ടികിടക്കാന് അനുവദിക്കില്ലെന്ന് പൊതുവിദ്യാഭ്യാസ മന്ത്രി വി. ശിവന്കുട്ടി. കൃത്യമായ ഇടവേളകളില് ഫയല് അദാലത്തുകള് നടത്തുമെന്നും ഇതിന്റെ രൂപരേഖ തയ്യാറാക്കിയെണ്ടന്നും മന്ത്രി പറഞ്ഞു. ബോധപൂര്വം ഫയലുകള് വച്ചു താമസിപ്പിക്കുന്ന ഉദ്യോഗസ്ഥര്ക്ക് വകുപ്പിന്റെ പിന്തുണ ലഭിക്കില്ലെന്നും മന്ത്രി കൂട്ടിച്ചേര്ത്തു. പൊതുവിദ്യാഭ്യാസ വകുപ്പിനു കീഴിലുള്ള 71 ഓഫീസുകള് ഇ – ഓഫീസ് സംവിധാനത്തിലേക്ക് മാറുന്നതിന്റെ പ്രവര്ത്തനോദ്ഘാടനം നിര്വഹിച്ചു സംസാരിക്കുകയായിരുന്നു മന്ത്രി.
സര്ക്കാര് സേവനം പൗരന്റെ അവകാശമാണ്. തപാലുകളും ഫയലുകളും സുതാര്യമായും വേഗത്തിലും നടപ്പാക്കാന് ഇ – ഓഫീസ് സൗകര്യത്തിലൂടെ സാധിക്കും. എയ്ഡഡ് മേഖലയെ ബുദ്ധിമുട്ടിക്കുന്ന നയങ്ങള് വകുപ്പിനില്ലെന്നും എല്ലാവരോടും നീതിപുലര്ത്തുന്ന സമീപനമാണ് സര്ക്കാരിന്റേതെന്നും മന്ത്രി പറഞ്ഞു.