കോട്ടയം: സ്വര്ണക്കടത്തു കേസിലെ ആരോപണങ്ങള്ക്ക് ചുട്ട മറുപടിയുമായി മുഖ്യമന്ത്രി പിണറായി വിജയന്. എന്തും വിളിച്ചു പറയാന് സാധിക്കുന്ന ഒരു നിലയല്ല നമ്മുടെ നാട്ടിലുള്ളതെന്ന് മുഖ്യമന്ത്രി പിണറായി വിജയന് പറഞ്ഞു.
പി.സി ജോര്ജിന് പരോക്ഷ മുന്നറിയിപ്പ് നല്കുന്നതായിരുന്നു മുഖ്യമന്ത്രിയുടെ വാക്കുകള്. ‘ലൈസന്സില്ലാത്ത നാക്കുകൊണ്ട് എന്തും പറയാമെന്ന നിലയെടുത്താല് അതിന്റെ ഫലം എന്തായിരിക്കുമെന്ന് ഈ അടുത്ത നാളില് നാം കണ്ടു. കെജിഒഎ സംസ്ഥാന സമ്മേളനം കോട്ടയത്ത് ഉദ്ഘാടനം ചെയ്ത് സംസാരിക്കുകവെയാണ് അദ്ദേഹം ഇക്കാര്യം പറഞ്ഞത്.
‘വിരട്ടനൊക്കെ നോക്കി, അതങ്ങ് വെറെ വെച്ചാല് മതി, അതൊന്നും ഇവിടെ ചെലവാകില്ല. ഈ നാടിന് ഒരു സംസ്കാരമുണ്ട്. ഒരു പൊതുവായ രീതിയുണ്ട്. അത് മാറ്റി വലിയ തോതില് ഭിന്നത വളര്ത്തികളയാമെന്ന് ആരെങ്കിലും വിചാരിച്ചാല്, അവരുടെ പിന്നില് ഏത് കൊലക്കൊമ്ബന് അണിനിരന്നാലും ശക്തമായ നടപടിയെടുത്ത് മുന്നോട്ട് പോകും. ജനം അതാണ് ആഗ്രഹിക്കുന്നത്’ – മുഖ്യമന്ത്രി പറഞ്ഞു. സ്വര്ണക്കടത്ത് കേസിലെ ആരോപണങ്ങള്ക്കും പ്രതിഷേധങ്ങള്ക്കുമിടെ കനത്ത സുരക്ഷാ കവചമാണ് മുഖ്യമന്ത്രിക്കും പരിപാടി നടക്കുന്ന മാമ്മന് മാപ്പിള ഹാളിനും ഒരുക്കിയിരുന്നത്.
ആര്എസ്എസിനേയും ബിജെപിയേയും കടന്നാക്രമിച്ചുകൊണ്ടാണ് മുഖ്യമന്ത്രി പ്രസംഗം ആരംഭിച്ചത്. രാജ്യത്തെ ആഭ്യന്തര പ്രശ്നങ്ങള് പരിഹരിക്കുന്നതിന് ഹിറ്റ്ലറേയാണ് ആര്എസ്എസും ബിജെപിയും മാതൃകയാക്കുന്നത്. അതവര് പച്ചയായി തുറന്ന് പറഞ്ഞിട്ടുമുണ്ട്. ഇപ്പോള് നമ്മുടെ രാജ്യത്ത് നടക്കുന്ന സംഭവങ്ങള് ഏതെങ്കിലും തരത്തില് ഉണ്ടായതല്ല. മതമല്ല ഈ രാജ്യത്തെ പൗരത്വത്തിന്റെ അടിസ്ഥാനം. വര്ഗീയതയെ പ്രീണിപ്പിച്ചുകൊണ്ട് മതനിരപേക്ഷതയെ സംരക്ഷിക്കാനാകില്ലെന്നും മുഖ്യമന്ത്രി വ്യക്തമാക്കി.
പിപ്പിടി കാണിച്ചാലൊന്നും ഇങ്ങോട്ട് ഏശില്ല. ഏത് കൊലക്കൊമ്ബന് അണിനിരന്നാലും വിരട്ടല് ഇങ്ങോട്ട് വേണ്ട. നുണയുടെ മലവെള്ളപ്പാച്ചിലാണ് നിയമസഭാ തിരഞ്ഞെടുപ്പിന് മുമ്ബാണ്ടായത്. അതെല്ലാം തള്ളിക്കളഞ്ഞുകൊണ്ടാണ് ജനം തങ്ങളെ അധികാരത്തിലേറ്റിയത്. ‘ഏത് തരത്തിലുള്ള പിപ്പിടി കാണിച്ചാലും അതൊന്നും ഇങ്ങോട്ട് ഏശില്ല. കൂടുതല് കാര്യങ്ങള് കെജിഒഎ വേദിയില് പറയുന്നില്ല. ഇതെല്ലാം പറഞ്ഞത്കൊണ്ട് അങ്ങനെ ഇളക്കി കളയാന് സാധിക്കുമെന്നാണ് കരുതുന്നത്. അതിനൊക്കെ വേറെ ആളെ നോക്കണം. ഞങ്ങള്ക്ക് ജനങ്ങളെ പൂര്ണ്ണവിശ്വാസമുണ്ട്. ജനങ്ങള്ക്ക് കാര്യങ്ങള് തിരിച്ചറിയാന് സാധിക്കും – മുഖ്യമന്ത്രി പറഞ്ഞു.