നസ്രിയ നായികയായി പുതിയ ചിത്രമാണ് ‘അണ്ടേ സുന്ദരാനികി’. ചിത്രത്തില് നാനിയായിരുന്നു നായകന്. സമ്മിശ്ര പ്രതികരണമാണ് ചിത്രത്തിന് തിയറ്ററുകളില് നിന്ന് ലഭിച്ചിരിക്കുന്നത്. ഇപ്പോഴിതാ ചിത്രത്തിന്റെ ഒടിടി റിലീസ് ഔദ്യോഗികമായി പ്രഖ്യാപിച്ചിരിക്കുകയാണ്.
നെറ്റ്ഫ്ളിക്സില് ആണ് ചിത്രം സ്ട്രീം ചെയ്യുക. ജൂലൈ 10ന് ആണ് ചിത്രം സ്ട്രീം ചെയ്ത് തുടങ്ങുക എന്നാണ് നെറ്റ്ഫ്ലിക്സ് ഔദ്യോഗികമായി അറിയിച്ചിരിക്കുന്നത്. നികേത് ബൊമ്മിറെഡ്ഡിയാണ് ചിത്രത്തിന്റെ ഛായാഗ്രാഹണം നിര്വഹിച്ചത്. വിവേക് അത്രേയ സംവിധാനം ചെയ്ത ‘അണ്ടേ സുന്ദരാനികി’ ജൂണ് 10ന് ആയിരുന്നു തിയറ്ററില് റിലീസ് ചെയ്തത്.
നവീന് യെര്നേനിയും രവി ശങ്കറുമാണ് ചിത്രം നിര്മിച്ചത്. മൈത്രി മൂവി മേക്കേഴ്സിന്റെ ബാനറിലാണ് നിര്മാണം. വിവേക് സാഗറാണ് ചിത്രത്തിന്റെ സംഗീത സംവിധാനം നിര്വഹിക്കുന്നത്. രവി തേജ ഗിരിജാല ചിത്രസംയോജനം നിര്വഹിച്ചു.
‘ലീല തോമസ്’ എന്ന കഥാപാത്രത്തെയാണ് നസ്രിയ ‘അണ്ടേ സുന്ദരാനികി’യില് അവതരിപ്പിക്കുന്നത്. തെന്നിന്ത്യയുടെ പ്രിയപ്പെട്ട താരങ്ങളില് ഒരാളായ നദിയ മൊയ്തുവും ചിത്രത്തില് അഭിനയിക്കുന്നുണ്ട്. ‘അണ്ടേ സുന്ദരാനികി’യില് താന് തന്നെയാണ് തെലുങ്കില് ഡബ്ബ് ചെയ്തതതെന്ന് നദിയ മൊയ്തു അറിയിച്ചിരുന്നു. ‘അണ്ടേ സുന്ദരാനികി’യില് ഹര്ഷ വര്ദ്ധന്, രാഹുല് രാമകൃഷ്ണ, സുഹാസ്, അളഗം പെരുമാള്, ശ്രീകാന്ത് അയങ്കാര് തുടങ്ങി ഒട്ടേറെ താരങ്ങള് അഭിനയിച്ചിട്ടുണ്ട്.