കോട്ടയം: ഗൂഗിള് മാപ്പ് നോക്കി സഞ്ചരിച്ച കാര് വഴി തെറ്റി തോട്ടില് വീണു. തോട്ടിലെ ഒഴുക്കില്പ്പെട്ട കാര് നാട്ടുകാര് പിടിച്ചുകെട്ടി യാത്രക്കാരെ രക്ഷപ്പെടുത്തി. രാത്രി എറണാകുളത്തുനിന്നു വന്ന കുടുംബം ഗൂഗിള് മാപ്പ് നോക്കി സഞ്ചരിക്കുന്നതിനിടെയാണ് വഴിതെറ്റി അപകടത്തില്പ്പെട്ടത്.
തിരുവാതുക്കല്-നാട്ടകം സിമിന്റു കവല ബൈപാസിലൂടെ പാറേച്ചാല് ബോട്ടുജെട്ടിയുടെ ഭാഗത്തേക്കാണ് കാര് നീങ്ങിയത്. ഈ ഭാഗത്ത് റോഡില് വെള്ളം കയറി റോഡും തോടും തിരിച്ചറിയാന് കഴിയാത്ത അവസ്ഥയിലായിരുന്നു.
തിരുവല്ലയിലേക്ക് യാത്ര ചെയ്ത കുമ്പനാട് സ്വദേശികളായ ഡോ.സോണിയ (32), അമ്മ ശോശാമ്മ (65), സഹോദരന് അനീഷ് (21), സോണിയയുടെ 6 മാസം പ്രായമുള്ള കുഞ്ഞ് എന്നിവരാണു കാറിലുണ്ടായിരുന്നത്.