ന്യൂഡല്‍ഹി: 2024 ലും നരേന്ദ്ര മോദി തന്നെയായിരിക്കും ബിജെപിയുടെ പ്രധാനമന്ത്രി സ്ഥാനാര്‍ത്ഥി. അടുത്ത തവണയും മോദി തന്നെ പ്രധാനമന്ത്രിയാകുമെന്ന് കേന്ദ്രമന്ത്രിമാരായ അമിത് ഷായും, ധര്‍മ്മേന്ദ്ര പ്രധാനും വ്യക്തമാക്കി. സാമ്ബത്തിക ശാസ്ത്രജ്ഞന്‍ അമര്‍ത്യ സെന്‍ തുടക്കമിട്ട പ്രധാനമന്ത്രി ചര്‍ച്ചയോട് പ്രതികരിക്കുകയായിരുന്നു നേതാക്കള്‍.
ഗുജറാത്ത് തെരഞ്ഞെടുപ്പ് ഫലം നല്‍കുന്ന സൂചന മോദി വീണ്ടും തെരഞ്ഞെടുക്കുമെന്നാണ്. ഗുജറാത്തിലെ ജനങ്ങള്‍ സംസ്ഥാനത്ത് റെക്കോഡ് സീറ്റുകള്‍ നേടി അധികാരം നിലനിര്‍ത്താന്‍ ബിജെപിയെ സഹായിച്ചു. അപകീര്‍ത്തിപ്പെടുത്താന്‍ ശ്രമിച്ചവര്‍ക്ക് മറുപടി നല്‍കിയെന്നും അമിത് ഷാ പറഞ്ഞു.
ഗുജറാത്തിലെ ജനങ്ങള്‍ ജാതീയതയുടെ വിഷം അവസാനിപ്പിക്കാന്‍ പ്രവര്‍ത്തിച്ചു. പൊള്ളയായതും വ്യാജവുമായ വാഗ്ദാനങ്ങള്‍ നല്‍കുന്നവരെ തല്ലിച്ചതച്ചു. ഗുജറാത്തിനെയും നരേന്ദ്ര മോദിയെയും അപകീര്‍ത്തിപ്പെടുത്താന്‍ ശ്രമിച്ചവര്‍ക്ക് ഗുജറാത്തിലെ ജനങ്ങള്‍ മറുപടി നല്‍കിയെന്നും ഷാ പറഞ്ഞു. ഈ ഫലത്തിന്റെ പ്രധാന്യം ഗുജറാത്തിനു മാത്രമല്ല. 2024 ലോക്‌സഭ തെരഞ്ഞെടുപ്പിലും ഉണ്ടാകും. ഒരിക്കല്‍ കൂടി നരേന്ദ്ര മോദിയെ പ്രധാനമന്ത്രിയാക്കാന്‍ രാജ്യം മുഴുവന്‍ തയാറാണ്. ഗുജറാത്തിന്റെ ഈ സന്ദേശം കശ്മീര്‍ മുതല്‍ കന്യാകുമാരി വരെ എത്തിയെന്നും അമിത് ഷാ കൂട്ടിച്ചേര്‍ത്തു. പ്രധാനമന്ത്രി പദത്തില്‍ തല്‍ക്കാലം ഒഴിവില്ലെന്നാണ് കേന്ദ്രമന്ത്രി ധര്‍മ്മേന്ദ്ര പ്രധാന്റെ മറുപടി
