തിരുവനന്തപുരം: ഹിന്ദി അടിച്ചേല്പ്പിക്കാനുള്ള കേന്ദ്ര സര്ക്കാര് നീക്കം അംഗീകരിക്കാനാവില്ലെന്ന് പ്രതിപക്ഷ നേതാവ് വി.ഡി സതീശന്.
രാജ്യത്തുടനീളം ഏതെങ്കിലും ഒരു ഭാഷ അടിച്ചേല്പ്പിക്കുന്നത് നാനാത്വത്തില് ഏകത്വം എന്ന ഭരണഘടനാ സങ്കല്പ്പത്തിന് എതിരാണെന്നും സതീശന് പറഞ്ഞു. ഫേസ്ബുക്ക് കുറിപ്പിലൂടെയായിരുന്നു അദ്ദേഹത്തിന്റെ പ്രതികരണം.
കേന്ദ്ര സര്വകലാശാലകള്, സ്കൂളുകള്, സര്ക്കാര് സ്ഥാപനങ്ങള് എന്നിവിടങ്ങളിലെ ആശയവിനിമയവും നടപടിക്രമങ്ങളും, കേന്ദ്ര സര്വീസുകളിലേക്കുള്ള റിക്രൂട്ട്മെന്റ് പരീക്ഷകളും പൂര്ണ്ണമായും ഹിന്ദിയില് ആക്കണമെന്ന് പാര്ലമെന്റിന്റെ ഔദ്യോഗിക ഭാഷാ സമിതി ശുപാര്ശ ചെയ്തതായാണ് മാധ്യമ വാര്ത്തകള്. പരീക്ഷകള് പൂര്ണ്ണമായും ഹിന്ദിയിലാക്കുന്നത് രാജ്യത്തെ വലിയൊരു വിഭാഗം യുവാക്കളുടെ ഭാവി തകര്ക്കും. തൊഴിലന്വേഷകരുടെ സ്വപ്നങ്ങള്ക്ക് മങ്ങലേല്ക്കും
ഒരു രാജ്യം, ഒരു ഭാഷ, ഒരു മതം, ഒരു ഭക്ഷണം, ഒരു സംസ്കാരം എന്നിവ നടപ്പാക്കാനുള്ള ബി.ജെ.പി സര്ക്കാരിന്റെ നീക്കം വളരെക്കാലമായി തുടരുകയാണ്. രാജ്യത്തിന്റെ അഖണ്ഡതയ്ക്കും ഫെഡറലിസത്തിനും എതിരായ നീക്കമാണിതെന്നും സതീശന് പറഞ്ഞു.