തിരുവനന്തപുരം: ആര്എസ്എസ്-ബിജെപി നേതൃത്വത്തിന്റെ അറിവോടെയാണ് സിപിഎം ജില്ലാ കമ്മിറ്റി ഓഫീസ് ആക്രമിച്ചതെന്ന് എല്ഡിഎഫ് കണ്വീനര് ഇ പി ജയരാജന്.
സമാധാനാന്തരീക്ഷം തകര്ക്കാന് അവര് ബോധപൂര്വമായ ശ്രമം നടത്തുകയാണ്. അതിനുള്ള എല്ലാ പ്രോത്സാഹനവും യുഡിഎഫിന്റെ ഭാഗത്തുനിന്നുണ്ട്. ജില്ലാ കമ്മിറ്റി ഓഫീസിന് നേരെയുള്ള ആക്രമണം ആസൂത്രിതമാണെന്നും അദ്ദേഹം പറഞ്ഞു.
ഇ.പി ജയരാജന്റെ വാക്കുകള്,
” കല്ലുകളും ആയുധങ്ങളുമായി മൂന്ന് ബൈക്കുകളിലായി എത്തിയാണ് ആക്രമിച്ചത്. ജില്ലാ സെക്രട്ടറിയുടെ കാറിന് നേരെ കല്ലേറുണ്ടായി. ശബ്ദം കേട്ട് പുറത്തിറങ്ങിയാല് ആരെയെങ്കിലും ആക്രമിക്കാന് പദ്ധതിയുണ്ടായിരുന്നതായി മനസ്സിലാക്കുന്നു.
തിരുവനന്തപുരം മുനിസിപ്പാലിറ്റി നന്നായി പ്രവര്ത്തിക്കുന്നു. മുനിസിപ്പാലിറ്റി സുഗമമായി പ്രവര്ത്തിക്കാന് ബിജെപി സാധാരണയായി അനുവദിക്കില്ല. കൗണ്സില് യോഗം അലങ്കോലപ്പെടുത്തുകയും ചര്ച്ച തടസ്സപ്പെടുത്തുകയുമാണ് പതിവ് പരിപാടി. തലസ്ഥാനത്തെ ജനങ്ങളുടെ കഷ്ടകാലത്തിന് മുനിസിപ്പാലിറ്റിയില് ബിജെപിക്ക് 30 ഓളം അംഗങ്ങളുണ്ടായിരുന്നു. അതിന്റെ ദുരന്തം അനുഭവിക്കുകയാണ്.”