തിരുവനന്തപുരം: സാമ്ബത്തിക പ്രതിസന്ധി രൂക്ഷമാകുന്ന സാഹചര്യത്തില്‍ ചെലവ് ചുരുക്കല്‍ നിര്‍ദ്ദേശങ്ങള്‍ കര്‍ശനമായി നടപ്പാക്കാനുള്ള തീരുമാനവുമായി സംസ്ഥാന സര്‍ക്കാര്‍.
ധനവകുപ്പിന്‍റെ നിര്‍ദേശങ്ങള്‍ പാലിക്കാന്‍ വകുപ്പ് മേധാവികള്‍ക്ക് ചീഫ് സെക്രട്ടറി നിര്‍ദേശം നല്‍കി. നിബന്ധന ലംഘിച്ച്‌ ചെലവഴിക്കുന്ന തുക ഉദ്യോഗസ്ഥരില്‍ നിന്ന് ഈടാക്കുമെന്നും മുന്നറിയിപ്പ്.
കഴിഞ്ഞ വര്‍ഷം നവംബറിലാണ് ധനവകുപ്പ് ചെലവ് ഗണ്യമായി വെട്ടിക്കുറയ്ക്കാന്‍ ഉത്തരവിറക്കിയത്. വിമാനയാത്രയ്ക്കുള്ള നിയന്ത്രണങ്ങള്‍, വാഹനങ്ങള്‍ വാങ്ങുന്നതിനും ഓഫീസ് സൗന്ദര്യവല്‍ക്കരണത്തിനും നിയന്ത്രണം, അധിക ചെലവ് കര്‍ശനമായും ഒഴിവാക്കുക എന്നിവ ഉത്തരവില്‍ ഉള്‍പ്പെടുന്നു. പുതുവര്‍ഷത്തില്‍ സാമ്ബത്തിക പ്രതിസന്ധി അതിന്‍റെ മൂര്‍ദ്ധന്യാവസ്ഥയിലായിരിക്കെയാണ് ചീഫ് സെക്രട്ടറി വകുപ്പ് മേധാവികളെ ഇതെല്ലാം ഓര്‍മ്മിപ്പിക്കുന്നത്. ധനവകുപ്പിന്‍റെ ഉത്തരവിന്‍റെ വിശദാംശങ്ങള്‍ അടങ്ങിയ സര്‍ക്കുലറാണ് ചീഫ് സെക്രട്ടറി പുറത്തിറക്കിയത്.
നിബന്ധന ലംഘിച്ച്‌ പണം ചെലവഴിച്ചാല്‍ നഷ്ടം ഉദ്യോഗസ്ഥരില്‍ നിന്ന് ഈടാക്കുമെന്നതുള്‍പ്പടെയുള്ള കര്‍ശന നിബന്ധനയെക്കുറിച്ച്‌ സര്‍ക്കുലര്‍ ഓര്‍മ്മിപ്പിക്കുന്നു. പ്രതിസന്ധി രൂക്ഷമായ സാഹചര്യത്തില്‍ വായ്പാ പരിധി ഉയര്‍ത്തുന്നതടക്കമുള്ള ആവശ്യങ്ങളുന്നയിച്ച്‌ കേന്ദ്രത്തെ സമീപിക്കാനാണ് തീരുമാനം. കേന്ദ്രത്തിന്‍റെ തെറ്റായ സാമ്ബത്തിക നയങ്ങള്‍ ചൂണ്ടിക്കാണിച്ച്‌ പ്രധാനമന്ത്രിക്ക് കത്തെഴുതും. ബജറ്റ് അവതരണത്തിനു ആഴ്ചകള്‍ മാത്രം ശേഷിക്കെ സാമ്ബത്തിക പ്രതിസന്ധി സര്‍ക്കാരിനെ വീണ്ടും പ്രതിസന്ധിയിലാക്കുകയാണ്.
