തിരുവനന്തപുരം | വൈദ്യുതി ചാര്ജ് വര്ധനക്കെതിരെ കടുത്ത വിമര്ശവുമായി പ്രതിപക്ഷ നേതാവ് വി ഡി സതീശന്. ചാര്ജ് വര്ധന ജനങ്ങളോടുള്ള വെല്ലുവിളിയാണെന്നും സര്ക്കാരിന്റെ ധൂര്ത്തിന് സാധാരണക്കാരെ ചൂഷണം ചെയ്യുകയാണെന്നും വി ഡി സതീശന് ആരോപിച്ചു.
കോടികള് ചെലവഴിച്ച് കേരളീയം ഉള്പ്പെടെയുള്ള ധൂര്ത്ത് നടത്തുന്നതിനിടയിലാണ് സര്ക്കാര് പാവങ്ങളെ ചൂഷണം ചെയ്യുന്നതെന്നും വിഡി സതീശന് വാര്ത്താകുറിപ്പില് കുറ്റപ്പെടുത്തി.
കെ എസ് ഇ ബിയെ ഈ സര്ക്കാര് അഴിമതിയുടെ കേന്ദ്രമാക്കി മാറ്റി. 1957 മുതല് 2016 വരെ കെ എസ് ഇ ബിയുടെ കടം 1083 കോടിയായിരുന്നത് പിണറായി സര്ക്കാരിന്റെ ഏഴ് വര്ഷത്തെ ഭരണം കൊണ്ട് 40000 കോടിയായി വര്ധിച്ചു. ഉമ്മന് ചാണ്ടി സര്ക്കാരിന്റെ കാലത്ത് ഒപ്പുവച്ച പവര് പര്ച്ചേസ് കരാര് റദ്ദാക്കിയതിലൂടെ 1500 കോടിയോളം രൂപയുടെ നഷ്ടമാണ് സംസ്ഥാനത്തിന് ഇപ്പോഴും ഉണ്ടായിക്കൊണ്ടിരിക്കുന്നത്. പുരപ്പുറ സോളര് പദ്ധതിയിലും 50000 കോടിയോളം രൂപയുടെ നഷ്ടമുണ്ടായി. അഴിമതി ലക്ഷ്യമിട്ട് സര്ക്കാര് കാട്ടിയ കെടുകാര്യസ്ഥതയുടെ ഭാരം ജനങ്ങളുടെ തലയിലേക്ക് കെട്ടിവയ്ക്കുന്നത് അവരുടെ ക്ഷമ പരീക്ഷിക്കല് കൂടിയാണെന്ന് ഭരണകര്ത്താക്കള് ഓര്ക്കണമെന്നും സതീശന് വ്യക്തമാക്കി
അതേ സമയം, സംസ്ഥാനത്ത് വൈദ്യുതി യൂണിറ്റിന് ശരാശരി 20 പൈസ വരെയാണ് കൂട്ടിയത്. പ്രതിമാസം 40 യൂണിറ്റില് താഴെയുള്ളവര്ക്ക് നിരക്ക് വര്ധന ബാധകമല്ല. 100 യൂണിറ്റ് ഉപയോഗിക്കുന്നവര്ക്ക് 20 ശതമാനം നിരക്ക് വര്ധനയുണ്ടാകും. വൈദ്യുതി റഗുലേറ്ററി കമ്മീഷന് നിരക്ക് വര്ധന ഇന്നലെ മുതല് പ്രാബല്യത്തില് വന്നു.