തിരുവനന്തപുരം: സര്ക്കാര്-ഗവര്ണര് തര്ക്കം തുടരുന്നതിനിടെ കണ്ണൂര് വി.സിക്കെതിരായ നടപടിയില് ഇന്ന് തീരുമാനമുണ്ടായേക്കും.
തിരിച്ചെത്തിയാല് ഉടന് നടപടി സ്വീകരിക്കുമെന്ന് ഗവര്ണര് നേരത്തെ വ്യക്തമാക്കിയിരുന്നു. കേരള സര്വ്വകലാശാല പ്രമേയത്തിലും ചരിത്ര കോണ്ഗ്രസ് ആക്രമണ ആരോപണത്തിലും ഗവര്ണറുടെ തുടര്നീക്കങ്ങള് പ്രതീക്ഷിക്കാം.
സ്വരച്ചേര്ച്ചയില്ലായ്മയില് ആരംഭിച്ച് തുറന്ന യുദ്ധത്തിലേക്ക് നീങ്ങിയ സര്ക്കാര്-ഗവര്ണര് തര്ക്കത്തിന്റെ പശ്ചാത്തലത്തില് രാജ്ഭവന്റെ നീക്കങ്ങള് എന്തൊക്കെയാണെന്നാണ് ഇനി അറിയേണ്ടത്. കണ്ണൂര് വി.സിക്കെതിരായ നടപടി, തനിക്കെതിരെ പ്രമേയം പാസാക്കിയ കേരള സര്വകലാശാലയുടെ നടപടിയില് വിശദീകരണം തേടല്, ചരിത്ര കോണ്ഗ്രസ് ആക്രമണ ആരോപണത്തിലെ തുടര് നടപടി തുടങ്ങി വിഷയങ്ങള് ധാരാളമുണ്ട്.
കണ്ണൂര് വി.സിക്കെതിരെ കേരളത്തില് തിരിച്ചെത്തിയാലുടന് നടപടി സ്വീകരിക്കുമെന്ന് ഗവര്ണര് തന്നെ നേരത്തെ പറഞ്ഞിരുന്നു. വിശദീകരണം തേടിയ ശേഷം കര്ശന നടപടി എടുക്കാനാണ് സാധ്യത.