കോഴിക്കോട്: മന്ത്രിസ്ഥാനത്തേക്ക് സജി ചെറിയാന് മടങ്ങിവരുന്നതിനെ രൂക്ഷമായി വിമര്ശിച്ച് കെപിസിസി പ്രസിഡന്റ് കെ സുധാകരന്.
സജി ചെറിയാന്റെ പ്രസംഗത്തില് ഭരണഘടനാ ലംഘനമില്ലെന്ന് സിപിഎം മാത്രം തീരുമാനിച്ചാല് മതിയോയെന്ന് കെപിസിസി പ്രസിഡന്റ് ചോദിച്ചു. ഒരു കാരണവശാലും സജി ചെറിയാന്റെ മന്ത്രിസ്ഥാനത്തേക്കുള്ള തിരിച്ചുവരവിനെ യുഡിഎഫിന് അംഗീകരിക്കാന് കഴിയില്ലെന്നും അദ്ദേഹം പറഞ്ഞു.
സജി ചെറിയാന് സത്യപ്രതിജ്ഞ ചെയ്യുന്ന ജനുവരി നാല് ബുധനാഴ്ച കരിദിനമായി യുഡിഎഫും കോണ്ഗ്രസും ആചരിക്കുമെന്ന് കെ സുധാകരന് പറഞ്ഞു. സജി ചെറിയാനെ എന്തിനാണ് മന്ത്രിസഭയില് നിന്ന് രാജിവെപ്പിച്ചതെന്ന് സിപിഎം പറയണം. ‘അദ്ദേഹം തെറ്റ് ചെയ്തില്ലെന്ന് പ്രാഥമികമായി സിപിഎമ്മിന് ഉറപ്പുണ്ടായിരുന്നെങ്കില് പിന്നെ എന്തിനാണ് അദ്ദേഹം രാജിവെച്ചത്? സജി ചെറിയാന്റെ പ്രസംഗത്തില് ഭരണഘടന ലംഘനം ഇല്ലെന്ന് സിപിഎം മാത്രം തീരുമാനിച്ചാല് മതിയോ? അവര്ക്ക് എന്തും ആകാമെന്ന സ്ഥിതിയാണ്. സിപിഎമ്മിന് മാത്രം ഒന്നും ബാധകമല്ല. പൊതുജനം ഇത് ശരിയാണോയെന്ന് ചിന്തിക്കണം. കേരളത്തില് ചരസ്സും എംഡിഎംഎയും ഒഴുകുകയാണ്. എല്ലാത്തിനും പിന്നില് സിപിഎം , ഡിവൈഎഫ്ഐ പ്രവര്ത്തകരാണ്. ലഹരി മാഫിയയ്ക്ക് വേണ്ടിയാണ് ഈ ഭരണമെന്നും’ കെ സുധാകരന് കുറ്റപ്പെടുത്തി.
ജനുവരി നാലിനാണ് സജി ചെറിയാന്റെ സത്യപ്രതിജ്ഞ. സംസ്ഥാന സര്ക്കാരില് സാംസ്കാരിക വകുപ്പായിരുന്നു സജി ചെറിയാന് കൈകാര്യം ചെയ്തിരുന്നത്. വിമര്ശനാത്മകമായി സംസാരിക്കുകയാണ് സജി ചെറിയാന് ചെയ്തതെന്നാണ് പൊലീസ് റിപ്പോര്ട്ട്. ഭരണഘടനയെയോ ഭരണഘടനാ ശില്പികളെയോ അവഹേളിച്ചിട്ടില്ല. കേസ് തുടര്ന്ന് അന്വേഷിക്കേണ്ട കാര്യമില്ലെന്നും പൊലീസ് റിപ്പോര്ട്ട് നല്കി. സജി ചെറിയാന് ഭരണഘടനയെ അവഹേളിച്ചതായി തങ്ങള്ക്ക് തോന്നിയിട്ടില്ലെന്നാണ് പ്രസംഗം കേട്ട തിരുവല്ല, റാന്നി എംഎല്എമാര് പോലും മൊഴി നല്കിയത്. ഇതിന് പിന്നാലെയാണ് സജി ചെറിയാന് വീണ്ടും മന്ത്രി സഭയിലേക്കുള്ള വരവിന് കളമൊരുങ്ങിയത്.